નવી દિલ્હી : પાકિસ્તાન તરફથી વારંવાર થઈ રહેલા યુદ્ધવિરામ ભંગ અને ડ્રોન હુમલાના ખતરાને પગલે ભારતના સરહદી વિસ્તારોમાં તણાવ વધી રહ્યો છે. ન્યૂઝફર્સ્ટના અહેવાલ અનુસાર, પંજાબના નાંગલ, નવાંશહર અને મોગા તેમજ જમ્મુ-કાશ્મીરમાં સંપૂર્ણ બ્લેકઆઉટ જાહેર કરવામાં આવ્યું છે.
દરમિયાન, ગુજરાતના કચ્છ જિલ્લાના નલિયામાં પણ આશરે ૮-૧૦ જેટલા ડ્રોન જોવા મળ્યા છે, જેના કારણે સરહદી વિસ્તારોમાં ગતિવિધિઓ અચાનક વધી ગઈ છે. તંત્ર દ્વારા લોકોને સતર્ક રહેવાની સૂચના આપવામાં આવી છે.
અન્ય એક અહેવાલ અનુસાર, અમૃતસર, જલંધર, બઠિંડા, પઠાણકોટ, ફિરોઝપુર, મુક્તસર, મોગા અને ગુરુદાસપુર સહિત પંજાબના વધુ વિસ્તારોમાં બ્લેકઆઉટની જાણ થઈ છે. આ સાથે જ એક ચાર્ટર ફ્લાઈટ દુબઈથી કરાચી તરફ જઈ રહી હોવાના પણ સમાચાર છે.
વધુમાં, પાકિસ્તાનના પેશાવરમાં પાકિસ્તાન એરફોર્સ બેઝને નિશાન બનાવીને ડ્રોન હુમલાના અહેવાલ પ્રાપ્ત થયા છે, જેમાં અનેક જોરદાર ધડાકા સંભળાયા હોવાનું કહેવાય છે. આ ઘટનાક્રમ સરહદી વિસ્તારોમાં સ્થિતિની ગંભીરતા દર્શાવે છે અને દેશભરમાં હાઈ એલર્ટ જાહેર કરવામાં આવ્યું છે. લોકોને શાંતિ જાળવવા અને તંત્રને સહકાર આપવા અપીલ કરવામાં આવી છે.