જમ્મુ અને કાશ્મીરમાં સરહદ પર પાકિસ્તાન દ્વારા કરવામાં આવેલા ગોળીબારમાં બોર્ડર સિક્યુરિટી ફોર્સ (BSF) સબ ઇન્સ્પેક્ટર મોહમ્મદ ઇમ્તિયાઝ શહીદ થયા હતા. શનિવાર, ૧૦ મે ૨૦૨૫ ના રોજ આરએસ પુરા વિસ્તારમાં સરહદ પારથી ગોળીબાર દરમિયાન મોહમ્મદ ઇમ્તિયાઝે બહાદુરીથી પોતાનો જીવ બલિદાન આપ્યો. બીએસએફ તેમની શહાદતને સલામ કરે છે અને તેમને શ્રદ્ધાંજલિ આપવા માટે રવિવારે (૧૧ મે) જમ્મુમાં ફ્રન્ટિયર હેડક્વાર્ટર ખાતે પુષ્પાંજલિ સમારોહનું આયોજન કરવામાં આવશે.

BSF એ તેના સત્તાવાર સોશિયલ મીડિયા હેન્ડલ પર પોસ્ટ કર્યું, "10 મે 2025 ના રોજ જમ્મુ જિલ્લાના આર.એસ.પુરા સેક્ટરમાં આંતરરાષ્ટ્રીય સરહદ પર ક્રોસ બોર્ડર ફાયરિંગ દરમિયાન રાષ્ટ્રની સેવામાં BSF ના બહાદુર સબ ઇન્સ્પેક્ટર મોહમ્મદ ઇમ્તિયાઝ દ્વારા આપેલા સર્વોચ્ચ બલિદાનને અમે સલામ કરીએ છીએ." પોસ્ટમાં આગળ કહેવામાં આવ્યું છે કે, "સબ ઇન્સ્પેક્ટર મોહમ્મદ ઇમ્તિયાઝે બહાદુરીથી સરહદી ચોકીનું નેતૃત્વ કર્યું." બીએસએફના ડાયરેક્ટર જનરલ (ડીજી) અને અન્ય તમામ રેન્કના અધિકારીઓએ તેમના પરિવાર પ્રત્યે ઊંડી સંવેદના વ્યક્ત કરી છે.

મોહમ્મદ ઇમ્તિયાઝ બીએસએફ બોર્ડર આઉટપોસ્ટના વડા તરીકે તૈનાત હતા અને શહીદી સમયે તેમની ફરજ બજાવતી વખતે લડ્યા હતા. તેમની બહાદુરીએ તેમના સાથીદારો અને અધિકારીઓને પ્રેરણા આપી, અને તેમની શહાદત સાબિત કરે છે કે સુરક્ષા દળોના જવાનો દેશની સુરક્ષા માટે પોતાનો જીવ જોખમમાં મૂકે છે