નવી દિલ્‍હીઃ  ભારત અને પાકિસ્તાન વચ્ચે તણાવ ઘણો વધી ગયો છે. ૬ મેના રોજ થયેલા હવાઈ હુમલા અને ૭-૮-૯ અને ૧૦ મેના રોજ ભારત અને પાકિસ્તાન વચ્ચે થયેલા ડ્રોન, મિસાઈલ અને રોકેટ હુમલા પછી, ગઈકાલે સાંજે બંને દેશો વચ્ચે યુદ્ધવિરામના સમાચાર આવ્યા, પરંતુ દુશ્મન દેશે ૩ કલાકમાં જ યુદ્ધવિરામનો ભંગ કર્યો. રાત્રે, પાકિસ્તાની સેનાએ ફરીથી જમ્મુ-કાશ્મીર, ગુજરાત, રાજસ્થાન અને પંજાબમાં ડ્રોન હુમલા કર્યા. ગઈકાલે રાત્રે જમ્મુ અને કાશ્મીર, રાજસ્થાન, પંજાબ અને ગુજરાતના સરહદી જિલ્લાઓમાં અંધારપટ છવાઈ ગયો હતો. જોકે ભારતીય સેનાએ પાકિસ્તાની સેનાના હુમલાનો યોગ્ય જવાબ આપ્યો હતો, પરંતુ પાકિસ્તાન ફરી એકવાર વિશ્વાસઘાતી નીકળ્યું.
વિદેશ સચિવ વિક્રમ મિશ્રીએ રાત્રે ૧૧ વાગ્યે પત્રકાર પરિષદમાં યુદ્ધવિરામ ઉલ્લંઘન અંગે માહિતી આપી. વિદેશ સચિવે કહ્યું કે પાકિસ્તાની સેનાએ ભારતીય સરહદમાં ઘૂસણખોરી કરવાનો પ્રયાસ કર્યો છે. ત્રણેય દળોને છૂટ આપવામાં આવી છે. જમ્મુ અને કાશ્મીરના રાજૌરી, અખનૂર, પૂંછ, નૌશેરા, શ્રીનગર, ઉધમપુર, આરએસપુરા અને સાંબામાં ડ્રોન હુમલા થયા છે. LOC પારથી સતત ગોળીબાર થઈ રહ્યો છે.
22 એપ્રિલથી 10 મે સુધીમાં, પાકિસ્તાનના ગોળીબાર, ડ્રોન, મિસાઇલ અને રોકેટ હુમલામાં 5 સૈનિકો શહીદ થયા છે. 60 સૈનિકો ઘાયલ થયા છે અને 25 નાગરિકોના મોત થયા છે. 50 થી વધુ લોકો ઘાયલ પણ થયા છે. રાજૌરીના એડિશનલ ડિસ્ટ્રિક્ટ ડેવલપમેન્ટ કમિશનર (ADDC) ડૉ. રાજ કુમાર થાપાએ પણ પાક સેનાના ગોળીબારમાં જીવ ગુમાવ્યો હતો. પરિસ્થિતિને ધ્યાનમાં રાખીને, સેનાને કડક કાર્યવાહી કરવાનો આદેશ આપવામાં આવ્યો છે.