નવી દિલ્હી : ૧૦-૧૧ મે ૨૦૨૫ ની રાત્રે પાકિસ્તાન દ્વારા કરવામાં આવેલા યુદ્ધવિરામ ભંગ અને હવાઈ ક્ષેત્રના ઉલ્લંઘનની ઘટનાઓને પગલે ભારતીય સેના વધુ આક્રમક બની છે. ચીફ ઓફ આર્મી સ્ટાફ (COAS) જનરલ ઉપેન્દ્ર દ્વિવેદીએ પશ્ચિમી સરહદના આર્મી કમાન્ડરો સાથે ઉચ્ચ સ્તરીય બેઠક યોજીને સુરક્ષાની સ્થિતિની સમીક્ષા કરી હતી.
સૂત્રોના જણાવ્યા અનુસાર, COAS જનરલ દ્વિવેદીએ ૧૦ મે ૨૦૨૫ ના રોજ ડાયરેક્ટર જનરલ ઓફ મિલિટરી ઓપરેશન્સ (DGMO) સ્તરની વાતચીત દ્વારા થયેલી સમજૂતીનું કોઈપણ પ્રકારે ઉલ્લંઘન થાય તો તેનો તાત્કાલિક અને જડબાતોડ જવાબ આપવા માટે આર્મી કમાન્ડરોને સંપૂર્ણ સત્તા પ્રદાન કરી છે. આ નિર્ણય દર્શાવે છે કે ભારત સરહદ પર શાંતિ જાળવવા માટે પ્રતિબદ્ધ છે, પરંતુ જો પાકિસ્તાન તરફથી કોઈપણ ઉશ્કેરણીજનક કાર્યવાહી કરવામાં આવશે તો ભારતીય સેના તેનો સખત પ્રતિકાર કરશે.
સેના પ્રમુખે કમાન્ડરોને સરહદ પર ચાંપતી નજર રાખવા અને કોઈપણ શંકાસ્પદ ગતિવિધિને તાત્કાલિક નિષ્ફળ બનાવવા માટે પણ નિર્દેશ આપ્યો છે. આ ઘટનાક્રમથી સ્પષ્ટ થાય છે કે ભારત પાકિસ્તાનના કોઈપણ દુ:સાહસનો સામનો કરવા માટે સંપૂર્ણપણે તૈયાર છે અને દેશની સુરક્ષા સર્વોપરી છે.