નવી દિલ્હી : અમૃતસરના અજનાલા સેક્ટરમાં ભારત-પાકિસ્તાન યુદ્ધ વચ્ચે, BSF અને પંજાબ પોલીસે સર્ચ ઓપરેશનમાં એક ખેતરમાંથી મોટી માત્રામાં વિસ્ફોટકો જપ્ત કર્યા છે. જપ્ત કરાયેલી સામગ્રીમાં 972 ગ્રામ RDX હેન્ડ ગ્રેનેડ ડેટોનેટર અને ડ્રોન દ્વારા ફેંકવામાં આવેલા હથિયારોનો સમાવેશ થાય છે. પોલીસે અજાણ્યા આરોપીઓ સામે કેસ નોંધીને તપાસ શરૂ કરી છે.

ભારત-પાકિસ્તાન યુદ્ધ વચ્ચે, BSF અને પંજાબ પોલીસના જવાનોએ બીજા દિવસે સર્ચ દરમિયાન ખેતરમાંથી વિસ્ફોટકો જપ્ત કર્યા છે.

અજનાલા સેક્ટરના ચક બાલા ગામના ખેતરોમાંથી મળેલા શસ્ત્રોના આ માલમાં, 972 ગ્રામ RDX, બે હેન્ડ ગ્રેનેડ, બે ડેટોનેટર, IED તૈયાર કરવામાં વપરાતા બે ડેટોનેટર, રિમોટ કંટ્રોલ, ચાર્જર, આઠ બેટરી, કાળા રંગનું બોક્સ વગેરે જપ્ત કરવામાં આવ્યા છે.

આ સાથે, આરોપીઓએ ડ્રોન દ્વારા ભારતીય સરહદમાં બે પિસ્તોલ, ત્રીસ કારતૂસ, ચાર મેગેઝિન પણ ફેંક્યા હતા. જેને સુરક્ષા એજન્સીઓએ જપ્ત કરી લીધો છે.

અજનાલા પોલીસ સ્ટેશનમાં અજાણ્યા આરોપીઓ વિરુદ્ધ કેસ નોંધવામાં આવ્યો છે. એસએસપી મનિન્દર સિંહે જણાવ્યું હતું કે શસ્ત્રો જપ્ત કર્યા પછી, આ માલ કોણ ઉપાડવાનું હતું તે શોધવામાં આવી રહ્યું છે. આ માટે જૂના દાણચોરોની યાદી શોધવામાં આવી રહી છે.

શનિવારે સવારે પણ બીએસએફ અને પંજાબ પોલીસના જવાનોએ બે કિલો સાતસો ગ્રામ આરડીએક્સ, બે ગ્રેનેડ, બે પિસ્તોલ સહિત હથિયારો જપ્ત કર્યા હતા.