નવી દિલ્હી : પાકિસ્તાનની સરહદે આવેલા હિમાચલ પ્રદેશ અને રાજસ્થાનના વિસ્તારોમાં શંકાસ્પદ ઉડતી વસ્તુઓના અહેવાલો વચ્ચે, બંને રાજ્યોમાં પાકિસ્તાની ફુગ્ગા મળી આવતા સનસનાટી મચી ગઈ છે. શ્રીગંગાનગરમાં ઇમરાન ખાનની પાર્ટી PTIનો ધ્વજ ફુગ્ગા સાથે બાંધેલો મળી આવ્યો હતો, જ્યારે ગાગરેટમાં પાકિસ્તાન ઇન્ટરનેશનલ એરલાઇન્સ (PIA) લખેલો ફુગ્ગો મળી આવ્યો છે. આ ઘટનાઓ બાદ, પોલીસ અને સુરક્ષા એજન્સીઓ સતર્ક છે અને તપાસ શરૂ કરી દીધી છે.

નોંધનીય છે કે પહેલગામમાં થયેલા આતંકવાદી હુમલા અને ત્યારબાદ ભારત દ્વારા હાથ ધરવામાં આવેલા 'ઓપરેશન સિંદૂર' પછી ભારત અને પાકિસ્તાન વચ્ચે તણાવ ચરમસીમાએ છે. આવી સ્થિતિમાં, સરહદી વિસ્તારોમાં પાકિસ્તાની ધ્વજ અને ફુગ્ગા મળવા એ સુરક્ષા એજન્સીઓ માટે ચિંતાનો વિષય બની ગયો છે અને તેઓ આ ઘટનાઓની ગંભીરતાથી તપાસ કરી રહ્યા છે.

રવિવારે સવારે યુદ્ધવિરામ પછી, હિમાચલ પ્રદેશના ગાગ્રેટ સબડિવિઝનના તાતેહરા ગામમાં એક પાકિસ્તાની વિમાન આકારનો ફુગ્ગો મળી આવ્યો. આ ફુગ્ગો એક ઘરની નજીક એક ઝાડમાં ફસાયેલો મળી આવ્યો હતો. ફુગ્ગા પર પાકિસ્તાન ઇન્ટરનેશનલ એરલાઇન્સ (PIA) લખેલું હતું અને ઉર્દૂમાં પણ કંઈક લખેલું હતું. માહિતી મળતાં જ ગાગ્રેટ પોલીસે તાત્કાલિક કાર્યવાહી કરી અને ફુગ્ગો જપ્ત કર્યો. પ્રારંભિક તપાસમાં, ફુગ્ગામાં કોઈ શંકાસ્પદ ઉપકરણ મળ્યું નથી. ગાગ્રેટના DSP ડૉ. વસુધા સૂદે જણાવ્યું હતું કે હિમાચલમાં પહેલા પણ આવા ફુગ્ગા મળી આવ્યા છે, પરંતુ ભારત અને પાકિસ્તાન વચ્ચેના વર્તમાન તણાવને કારણે, પોલીસે આ વખતે તાત્કાલિક કાર્યવાહી કરી છે. તેમણે કહ્યું કે ફુગ્ગાની તપાસ કરવામાં આવી છે અને તેમાં કોઈ વાંધાજનક વસ્તુ મળી નથી.

શ્રીગંગાનગરના ઘમુદવાલી પોલીસ સ્ટેશન વિસ્તારના ગામ 51LNP માં, સ્થાનિક ગ્રામજનોએ ફુગ્ગાઓ સાથે પાકિસ્તાની ધ્વજ લહેરાતો જોયો. આ ધ્વજ પર પાકિસ્તાનના ભૂતપૂર્વ વડા પ્રધાન ઇમરાન ખાનની પાર્ટી પાકિસ્તાન તહરીક-એ-ઇન્સાફ (PTI) નું નામ અંગ્રેજી અને ઉર્દૂમાં લખેલું હતું, સાથે પાર્ટીનું ચૂંટણી પ્રતીક 'બેટ' પણ છાપેલું હતું. માહિતી મળતાં જ પોલીસે ઘટનાસ્થળે પહોંચીને ધ્વજને કબજે લીધો અને તપાસ શરૂ કરી. જોકે ધ્વજ સાથે કોઈ શંકાસ્પદ વસ્તુ મળી નથી, પરંતુ ભારત અને પાકિસ્તાન વચ્ચેના તણાવપૂર્ણ વાતાવરણને ધ્યાનમાં રાખીને સુરક્ષા એજન્સીઓ સાવચેતી રાખી રહી છે.