જમ્મુ: જમ્મુ-કાશ્મીરમાં ૩૭ વર્ષથી ફેલાયેલા આતંકવાદની આગને ફક્ત ત્રણ આતંકી સરગનાઓની ધરપકડથી શાંત કરી શકાય છે. જમ્મુ-કાશ્મીર પોલીસનું માનવું છે કે જૈશ-એ-મોહમ્મદના મૌલાના મસૂદ અઝહર, લશ્કર-એ-તૈબાના હાફિઝ મોહમ્મદ સઈદ અને હિઝબુલ મુજાહિદ્દીનના સૈયદ સલાહુદ્દીનને પાકિસ્તાન ભારતને સોંપે તો કાશ્મીરમાં આતંકવાદ ૯૦ ટકા ખતમ થઈ શકે છે.

આ ત્રણેય સરગનાઓ હાલ પાકિસ્તાનમાં છે અને ભારતે તેમના નામની સૂચિ પાકિસ્તાનને અનેક વખત સોંપી છે. આ ત્રણેય આતંકવાદી સંગઠનો કાશ્મીરમાં હજુ સક્રિય છે, જ્યારે અન્ય સંગઠનોનો સફાયો થઈ ચૂક્યો છે.

હાફિઝ સઈદે ક્યારેય કાશ્મીરની મુલાકાત લીધી નથી, પરંતુ તેના સંગઠનની ઘટનાઓ માટે પોલીસ તેને જવાબદાર ગણે છે. મસૂદ અઝહર અને સૈયદ સલાહુદ્દીન કાશ્મીરમાં સીધી આતંકી ઘટનાઓ સાથે જોડાયેલા છે. સલાહુદ્દીન, જે કાશ્મીરનો નાગરિક છે, ૧૯૮૭ની વિવાદાસ્પદ ચૂંટણી બાદ હિઝબુલ મુજાહિદ્દીનનો સર્વોચ્ચ નેતા બન્યો. તેના પર જમ્મુ-કાશ્મીરના વીજમંત્રી ગુલામ હસન બટની હત્યાનો આરોપ છે, જ્યારે મસૂદ અઝહર પર ૧ ઓક્ટોબરના કાશ્મીર વિધાનસભા પરના આત્મઘાતી હુમલાનો આરોપ છે, જેમાં ૪૬ લોકો માર્યા ગયા. પોલીસના જણાવ્યા અનુસાર, આ ત્રણેયની ધરપકડ આતંકવાદીઓનું મનોબળ તોડી શકે છે. (સુરેશ ડુગર દ્વારા)