<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Friday, 16th May 2025

વિદેશ ફરવા જતાં ગુજરાતીઓ શું-શું ખાવાનું લઈ જઈ રહ્યા છે?

ગુજરાતીઓ વિશ્વના કોઈ પણ ખૂણે ફરવા જાય પરંતુ તેની સાથે ગુજરાતી વાનગીઓ લઈ જવાનું ભૂલતા નથી : ગુજરાતીઓમાં વિદેશ ટ્રાવેલ દરમિયાન ફ્રીઝ-ડ્રાય આઈસક્રીમ લઈ જવાનો ટ્રેન્‍ડ વધ્‍યો છે

નવી દિલ્‍હી તા.૧૬: ગુજરાતીઓ વિશ્વના કોઈ પણ ખૂણે ફરવા જાય પરંતુ તેની સાથે ગુજરાતી વાનગીઓ લઈ જવાનું ભૂલતા નથી. સામાન્‍ય રીતે ગુજરાતીઓ થેપલા, ખાખરા અને અથાણા જેવી વસ્‍તુઓ તો અચૂક રાખતા હોય છે, પરંતુ એવું કહેવામાં આવે કે હવે તેઓ પોતાના વિદેશ પ્રવાસમાં આઈસક્રીમ, બાસુંદી અને કેરીનો રસ પણ લઈ જઈ રહ્યા છે તો તમને ચોક્કસથી આヘર્ય થશે. જોકે, તેઓ આ બધી વસ્‍તુઓ ફ્રોઝન કરીને લઈ જઈ રહ્યા છે. અમારા સહયોગી ટાઈમ્‍સ ઓફ ઈન્‍ડિયાના રિપોર્ટ પ્રમાણે હાલમાં વેકેશન માણવા ફોરેન જતાં ગુજરાતીઓમાં દરમિયાન ફ્રીઝ-ડ્રાઈડ આઈસક્રીમ, બાસુંદી અને કેરીનો રસ લઈ જવાનો ટ્રેન્‍ડ જોવા મળી રહ્યો છે.

મોટી સંખ્‍યામાં ગુજરાતી સ્‍ટુડન્‍ટ્‍સ ફોરેનમાં અભ્‍યાસ કરે છે જેના કારણે તેમને મળવા ફોરેન જતાં પેરેન્‍ટ્‍સની સંખ્‍યા ઘણી મોટી છે, આ ઉપરાંત વેકેશનમાં ફોરેન જવાનો પણ ટ્રેન્‍ડ વધ્‍યો છે જેના કારણે ફ્રોઝન બાસુંદી અને કેરીનો રસ લઈ જવાનો ટ્રેન્‍ડ હવે ધીમે ધીમે એક માઈક્રો બિઝનેસ બની રહ્યો છે. મોટા ભાગના ગુજરાતીઓ વેજીટેરિયન હોય છે જેના કારણે ફ્રીઝ-ડ્રાઈડ ઈન્‍ડિયન આઈસક્રીમ હવે ફોરેન ટૂર માટે જરૂરી ચીજવસ્‍તુઓ બની રહી છે. ઈન્‍ડસ્‍ટ્રીના સૂત્રોનું કહેવું છે કે, ફક્‍ત ફ્રીઝ-ડ્રાય કરેલા આઈસક્રીમની ડિમાન્‍ડ દરરોજ ૪૦૦થી ૫૦૦ કિલો સુધી વધી ગઈ છે, અને રાજ્‍યભરમાં ફ્રીઝ-ડ્રાય કરતાં આઈસક્રીમના ૪૦થી વધુ યુનિટ છે.

ટ્રાવેલ એજન્‍ટ સ્‍મિતા મોદીએ જણાવ્‍યું હતું કે, તેઓ મોટા ભાગે જૈન અને સ્‍વામીનારાયણ ટ્રાવેલર્સને હેન્‍ડલ કરે છે. ફોરેનના આઈસક્રીમમાં ઈંડા અથવા તો અન્‍ય નોન-વેજીટેરિયન ઈન્‍ગ્રેડિયન્‍ટ્‍સ હોવાના ડરના કારણે જૈન અને સ્‍વામીનારાયણ ટ્રાવેલર્સ તેને ખાવાનું ટાળતા હોય છે. તેથી હવે તે આવા ટ્રાવેલર્સના ટ્રાવેલ પેક સાથે ફ્રીઝ-ડ્રાઈડ આઈસક્રીમ પણ પૂરો પાડે છે. એક ટૂરમાં ૧૦૦ કિલો જેટલો આઈસક્રીમ જાય છે. આમાં વધારે ખર્ચો પણ થતો નથી અને તેની સાથે ટ્રાવેલિંગમાં કોઈ માથાકૂટ પણ થતી નથી.

ફ્રીઝ-ડ્રાઈડ ફૂડ ફેસિલિટી ધરાવતા હર્ષિલ પટેલનું કહેવું છે કે, છેલ્લા ત્રણ વર્ષથી રેડી-ટૂ-ઈટ ફૂડની લોકપ્રિયતામાં મોટો ઉછાળો આવ્‍યો છે. જ્‍યારે આ વર્ષે આઈસક્રીમનું ચલણ સૌથી વધારે છે. સૌથી પહેલા આઈસ્‍ક્રીમને માઈનસ ૩૦ ડિગ્રી સેલ્‍સિયસ પર ફ્‌લેશ-ફ્રીઝ કરવામાં આવે છે, અને ત્‍યારબાદ ૫૦ ડિગ્રી સેલ્‍સિયસ પર નવ કલાક સુધી ધીમે ધીમે તેને ડ્રાય કરવામાં આવે છે. અંતે તે ક્રન્‍ચી, વેફર જેવા કયુબ બની જાય છે અને તેને પાણી અથવા તો દૂળમાં મિક્‍સ કરવામાં આવે ત્‍યારે તે તાજો આઈસક્રીમ બની જાય છે. હર્ષિલ પટેલ પોતાના યુનિટમાં દરરોજ ૬૫૦ કિલો ફૂડનું પ્રોસેસ કરે છે. જેમાંથી ૧૫ ટકા ફ્રોઝન ડેઝર્ટ હોય છે. સુપરમાર્કેટ, તોક શોપ્‍સ અને ટૂર ઓપરેટર્સ પુરવઠો એકઠો કરી રહ્યા છે. અન્‍ય એક -ોસેસર સમીર અવાડિયાનું કહેવું છે કે લોકો હવે કોઈ પણ જાતની ચિંતા વગર વિદેશમાં પણ ઘરના ભોજનનો આનંદ માણી શકે છે, અને સૌથી મોટા ક્‍લાયન્‍ટ્‍સ ટ્રાવેલ એજન્‍ટ્‍સ અને કેટરર્સ છે.

અમદાવાદમાં લોકપ્રિય ફૂડ સ્‍ટોર ધરાવતા વિરલ મોદીએ જણાવ્‍યું હતું કે, ફક્‍ત ટૂરિસ્‍ટ્‍સ જ ફ્રીઝ-ડ્રાય ફૂડ નથી લઈ જતાં પરંતુ પેરેન્‍ટ્‍સ પણ વિદેશમાં રહેતા તેમના બાળકોને ઘરનું ભોજન મોકલતા પહેલા ડ્રાય કરાવે છે. હાલમાં આઈસક્રીમની ડિમાન્‍ડમાં જોરદાર વધારો થયો છે પરંતુ કેરીનો રસ, ગાજરનો હલવો અને હાંડવાની પણ ડિમાન્‍ડ ઘણી મોટી છે. જોકે, આના લાભ ફક્‍ત ફૂડ મેકર્સને જ થઈ રહ્યો છે તેવું નથી, મશિનરી મેન્‍યુફેક્‍ચરર્સના ઓર્ડરમાં પણ ઉછાળો આવ્‍યો છે. ઈન્‍ડસ્‍ટ્રીમાં ઈક્‍વિપમેન્‍ટ સપ્‍લાય કરનારા ચંદ્રકાંત પટેલે જણાવ્‍યું હતું કે, હાલમાં ગુજરાતમાં ૪૦થી વધુ ફ્રીઝ-ડ્રાયિંગ યુનિટ્‍સ છે અને તેમાં સતત વધારો થઈ રહ્યો છે.(૩૮.૯)

(10:06 AM IST)