નવી દિલ્હી: દિલ્હીમાં આમ આદમી પાર્ટી (AAP) ને મોટો રાજકીય ફટકો લાગ્યો છે. કોર્પોરેટર હેમચંદ્ર ગોયલના નેતૃત્વમાં લગભગ 15 કોર્પોરેટરોએ શનિવારે બેઠક યોજીને AAPમાંથી રાજીનામું આપ્યું છે અને 'ઈન્દ્રપ્રસ્થ વિકાસ પાર્ટી' નામની નવી પાર્ટીની રચના કરી છે. આ નવા થર્ડ ફ્રન્ટનું નેતૃત્વ મુકેશ ગોયલને સોંપવામાં આવ્યું છે.
આ 15 કોર્પોરેટરોમાં દિનેશ ભારદ્વાજ, સુમન અનિલ રાણા, મુકેશ ગોયલ અને હેમચંદ્ર ગોયલ જેવા જાણીતા નામોનો સમાવેશ થાય છે. આ નવા રાજકીય ઘટનાક્રમ બાદ દિલ્હી મ્યુનિસિપલ કોર્પોરેશન (MCD) માં રાજકીય સમીકરણો બદલાઈ ગયા છે. હાલમાં MCDમાં ભાજપના 117 સભ્યો છે, AAPના 113 સભ્યો છે અને કોંગ્રેસના 8 સભ્યો છે.
રાજીનામું આપનારા કોર્પોરેટરોએ AAP પર ગંભીર આરોપો લગાવ્યા છે. પૂર્વ નેતા સદન મુકેશ ગોયલે જણાવ્યું હતું કે, "AAPમાં હંમેશા ઉપરથી આદેશો આવતા હતા, નીચેના લોકોની વાત સાંભળવામાં આવતી નહોતી. મને નેતા સદન બનાવવામાં આવ્યો, પરંતુ અમને કોઈ માહિતી આપવામાં આવતી નહોતી. મેં 2022માં AAPની ટિકિટ પર ચૂંટણી લડી હતી."
હેમચંદ્ર ગોયલે કહ્યું હતું કે, "નિગમનો અર્થ સત્તાનું વિકેન્દ્રીકરણ છે, પરંતુ AAPએ કેન્દ્રીય સ્તરે એક જ વ્યક્તિને સત્તા આપી દીધી છે."
આ ઘટનાક્રમ AAP માટે મોટો ઝટકો માનવામાં આવે છે, અને દિલ્હીના રાજકારણમાં નવા સમીકરણો રચાઈ શકે છે.