તા. ૧૨ સપ્ટેમ્બર ર૦ર૬ વિક્રમ સંવત ર૦૮૨ ભાદરવા સુદ – ૧ શનિવાર
News of Monday, 19th May 2025
કર્નલ પર કટાક્ષ મંત્રીને ભારે પડ્યો : સુપ્રીમ કોર્ટ લાલઘૂમ : SIT તપાસનો આદેશ
સુપ્રીમની ગંભીર ટિપ્પણી - "આખા દેશે શરમ અનુભવી" : મહિલા આર્મી અધિકારી પરના વિવાદાસ્પદ નિવેદન બદલ મંત્રી વિજય શાહની માફી કોર્ટે ફગાવી : ૨૮ મે સુધીમાં રિપોર્ટ માંગ્યો

નવી દિલ્હી: મધ્ય પ્રદેશના એક મંત્રી કર્નલ સોફિયા કુરેશી પર કરેલી ટિપ્પણીને કારણે સુપ્રીમ કોર્ટના રોષનો ભોગ બન્યા છે. કોર્ટે માત્ર તેમની માફી જ નકારી નથી કાઢી, પરંતુ તેમના નિવેદનને આખા દેશ માટે શરમજનક ગણાવ્યું છે. આ મામલે હવે સ્પેશિયલ ઇન્વેસ્ટિગેશન ટીમ (SIT) તપાસ કરશે અને તેને ૨૮ મે સુધીમાં પોતાનો રિપોર્ટ સુપરત કરવાનો રહેશે.
જસ્ટિસ સૂર્યકાંત અને એન. કોટિશ્વર સિંહની બેન્ચે મંત્રી વિજય શાહને આકરી ફટકાર લગાવતા કહ્યું કે તેમણે આવી બિભત્સ ટિપ્પણીઓ કરતા પહેલાં વિચારવું જોઈએ. કોર્ટે સ્પષ્ટ શબ્દોમાં કહ્યું કે મંત્રીએ સાચા હૃદયથી માફી માંગીને અથવા પસ્તાવો વ્યક્ત કરીને પોતાની છબી સુધારવી જોઈએ.
કોર્ટે મધ્ય પ્રદેશ સરકારને તાત્કાલિક અસરથી SITની રચના કરવાનો આદેશ આપ્યો છે. આ ટીમમાં રાજ્ય બહારના ત્રણ વરિષ્ઠ IPS અધિકારીઓ હશે, જેમાં એક મહિલા અધિકારીનું હોવું ફરજિયાત છે. કોર્ટે ભારપૂર્વક જણાવ્યું કે કાયદો બધા માટે સમાન છે, પછી ભલે તે કોઈ પણ હોદ્દા પર હોય.
વિજય શાહે તેમની વિરુદ્ધ નોંધાયેલી FIRને રદ કરવાની માંગ કરતી અરજી સુપ્રીમ કોર્ટમાં દાખલ કરી હતી. જ્યારે તેમના વકીલે કોર્ટને જણાવ્યું કે તેમણે માફી માંગી લીધી છે, ત્યારે કોર્ટે તેમની માફીની સત્યતા અને ઇરાદા પર સવાલ ઉઠાવ્યા હતા. જસ્ટિસ સૂર્યકાંતે ટિપ્પણી કરી હતી કે તેઓ વિડિયો ક્લિપ્સ જોઈ રહ્યા છે અને મંત્રીની માફી માત્ર પરિણામોથી બચવાનો પ્રયાસ છે કે સાચા પસ્તાવાનો ભાવ છે તે જોવું પડશે. તેમણે મંત્રીની માફીને 'મગરના આંસુ' પણ ગણાવી હતી.
જોકે કોર્ટે વિજય શાહની ધરપકડ પર સ્ટે મૂક્યો છે, પરંતુ સાથે જ ચેતવણી આપી છે કે આ મામલાને રાજકીય રંગ આપવાની મંજૂરી આપવામાં આવશે નહીં. જસ્ટિસ કાંતે રાજ્ય સરકારને સ્પષ્ટ શબ્દોમાં કહ્યું કે મંત્રીએ તેમના કૃત્યોનું પરિણામ ભોગવવું પડશે અને કાયદો પોતાનું કામ કરશે.
સુપ્રીમ કોર્ટે આ SIT તપાસને મધ્ય પ્રદેશ સરકાર માટે એક કસોટી સમાન ગણાવી છે અને સ્પષ્ટ કર્યું છે કે કોર્ટ આ કેસ પર ચાંપતી નજર રાખશે. કોર્ટે જણાવ્યું કે તેઓ આ મામલામાં સંપૂર્ણ ન્યાય સુનિશ્ચિત કરશે અને જો તપાસમાં કોઈ પણ પ્રકારની ક્ષતિ જણાશે તો તે ગંભીર પગલાં લેશે. આ ઘટનાએ રાજકીય વર્તુળોમાં પણ ભારે ચર્ચા જગાવી છે.
(1:56 PM IST)









છેલ્લા 8 દિવસમાં સૌથી લોકપ્રિય 
