News of Monday, 19th May 2025
ગાઝિયાબાદમાં ગુંડારાજ! હાઇટેક કોલેજની બહાર બીબીએના વિદ્યાર્થીને લાકડીઓ અને સળિયાથી બેરહેમીથી માર માર્યો : વીડિયો વાયરલ!
માસ્ક પહેરેલા ગુંડાઓએ રસ્તા વચ્ચે વિદ્યાર્થીને લોહીલુહાણ કર્યો : ગયા વર્ષના ઝઘડાનું પરિણામ? પીડિતની હાલત ગંભીર : બે આરોપીની ધરપકડ

ગાઝિયાબાદ: ઉત્તર પ્રદેશના ગાઝિયાબાદમાં કાયદો અને વ્યવસ્થાની સ્થિતિ જાણે કથળી ગઈ હોય તેવા દ્રશ્યો સામે આવ્યા છે. હાઇટેક કોલેજની બહાર કેટલાક માસ્ક પહેરેલા ગુંડાઓએ બીબીએના અંતિમ વર્ષના વિદ્યાર્થીને લાકડીઓ અને સળિયાથી નિર્દયતાથી માર માર્યો હતો. આ ભયાનક ઘટના કેમેરામાં કેદ થઈ ગઈ છે અને તેનો ચોંકાવનારો વીડિયો સોશિયલ મીડિયા પર વાયરલ થઈ રહ્યો છે, જેણે લોકોમાં ભારે રોષ ફેલાવ્યો છે. વીડિયોમાં સ્પષ્ટપણે જોઈ શકાય છે કે ગુંડાઓ રસ્તા વચ્ચે એક યુવાનને લાકડીઓ અને સળિયાથી માર મારી રહ્યા છે અને વિદ્યાર્થી લોહીથી લથપથ હાલતમાં રસ્તા પર પડેલો છે.
અહેવાલો અનુસાર, હાપુડના ત્યાગી નગરનો રહેવાસી ધ્રુવ ત્યાગી નામનો વિદ્યાર્થી ગુરુવારે (૧૫ મે) સાંજે કોલેજમાંથી બહાર નીકળી રહ્યો હતો ત્યારે અચાનક ચાર યુવકોના ટોળાએ તેના પર હુમલો કર્યો હતો. હુમલાખોરોએ જાહેરમાં બેઝબોલ બેટ અને લાકડાની લાકડીઓથી તેના પર તૂટી પડ્યા હતા. વીડિયોમાં દેખાય છે કે ગુંડાઓ ધ્રુવને વારંવાર લાકડીઓ અને સળિયાથી માર મારી રહ્યા છે, જ્યારે તે ફૂટપાથ પર પડેલો તરફડિયાં મારી રહ્યો હતો અને તેના માથા તેમજ જડબામાંથી લોહી વહી રહ્યું હતું.
ઘટનાસ્થળે હાજર લોકો અને અન્ય વિદ્યાર્થીઓએ તાત્કાલિક ધ્રુવને નજીકની હોસ્પિટલમાં ખસેડ્યો, જ્યાં તેની ગંભીર હાલત જોતા તેને સઘન સંભાળ એકમ (ICU)માં દાખલ કરવામાં આવ્યો છે. આ સમગ્ર ઘટના કેમેરામાં કેદ થઈ ગઈ હતી અને તેનો વીડિયો સોશિયલ મીડિયા પર આગની જેમ ફેલાઈ ગયો છે. ઘટના બાદ ધ્રુવના ભાઈ ઉદય ત્યાગીની ફરિયાદના આધારે વેવ સિટી પોલીસ સ્ટેશનમાં ચાર આરોપીઓ - વત્સ, આલોક, સુમિત અને નક્કુલ સાંગવાન વિરુદ્ધ FIR નોંધવામાં આવી છે, જેમાં કેટલાક અજાણ્યા લોકોનો પણ ઉલ્લેખ છે.
પોલીસે આ મામલે ત્વરિત કાર્યવાહી કરતા બે આરોપીઓની ધરપકડ કરી લીધી છે અને અન્ય આરોપીઓની ઓળખ મેળવવા તેમજ તેમને પકડવા માટે CCTV ફૂટેજની ઝીણવટભરી તપાસ કરી રહી છે.
પીડિત પરિવારના જણાવ્યા અનુસાર, ધ્રુવનો ગયા વર્ષે કોલેજના એક રમતગમતના કાર્યક્રમ દરમિયાન કેટલાક વિદ્યાર્થીઓ સાથે ઝઘડો થયો હતો. તે ઝઘડા બાદ ધ્રુવે નિયમિત કોલેજ જવાનું બંધ કરી દીધું હતું અને તે માત્ર પરીક્ષા આપવા માટે જ કોલેજ આવતો હતો. હુમલા પાછળનું ચોક્કસ કારણ હજુ સુધી જાણી શકાયું નથી, પરંતુ પોલીસ અધિકારીઓ આ ઘટનાને અગાઉના ઝઘડા સાથે જોડીને તપાસ કરી રહ્યા છે.
એવા અહેવાલો પણ છે કે હોસ્પિટલમાં દાખલ હોવાના કારણે ધ્રુવ શનિવારની તેની પરીક્ષા ચૂકી ગયો હતો. તેના પરિવારે જણાવ્યું કે ધ્રુવ વારંવાર બેભાન થઈ જાય છે અને તે ઊંડા માનસિક આઘાતમાં છે. આ ઘટનાએ ગાઝિયાબાદમાં કાયદો અને વ્યવસ્થાની સ્થિતિ પર ગંભીર સવાલો ઊભા કર્યા છે અને લોકોમાં ભયનો માહોલ છે.
https://x.com/lokeshRlive/status/1924442873266659822
(8:33 PM IST)









છેલ્લા 8 દિવસમાં સૌથી લોકપ્રિય 
