કાન્સ: ફ્રાન્સના કાન્સ શહેરમાં ચાલી રહેલા પ્રતિષ્ઠિત કાન્સ ફિલ્મ ફેસ્ટિવલ ૨૦૨૫ માં બોલિવૂડ સુંદરીઓનો જમાવડો જોવા મળી રહ્યો છે, પરંતુ આ વખતે બધી જ ચર્ચાઓ મિસ હરિયાણા ૨૦૨૩, અભિનેત્રી રૂચિ ગુર્જરએ ખેંચી લીધી છે. રૂચિ કાન્સના રેડ કાર્પેટ પર એક અનોખા રાજસ્થાની દુલ્હન લુક સાથે પહોંચી હતી, પરંતુ સૌથી વધુ ધ્યાન તેના કસ્ટમાઇઝ્ડ નેકલેસ પર ગયું, જેમાં વડાપ્રધાન નરેન્દ્રભાઈ મોદીના ત્રણ ફોટા જોડાયેલા હતા!
પરંપરાગત રાજસ્થાની લુક અને PM મોદીનો હાર
રૂચિનો આ લુક સૌપ્રથમ નજરે જ દર્શકોને મંત્રમુગ્ધ કરી દે તેવો હતો. તેણે ટ્રેડિશનલ રાજસ્થાની નેકલેસને ગોલ્ડન કલરના ભવ્ય લહેંગા સાથે પેર કર્યો હતો. આ આઉટફિટ જાણીતા ડિઝાઇનર રૂપા શર્મા દ્વારા ડિઝાઇન કરવામાં આવ્યો હતો, જેમાં મિરર વર્ક સાથે ગોટા પટ્ટી અને ભરતકામનું અદ્ભુત સંયોજન હતું. આ ડ્રેસ સાથે રૂચીએ ખાસ બંધાણી દુપટ્ટો પહેર્યો હતો, જેમાં જરદોસી અને ગોટા પટ્ટીનું ભરતકામ હતું. દુપટ્ટા અંગે તેણે કહ્યું, "આ દુપટ્ટો પહેરીને, મને એવું લાગ્યું કે મેં મારા પર રાજસ્થાનનો આત્મા પહેર્યો છે."
"ભારત માટે ગર્વની ક્ષણ": PM મોદીને સન્માન
કાન્સમાં પોતાના અનોખા લુક અંગે રૂચિએ જણાવ્યું કે, "આ હાર ફક્ત ઘરેણાંથી પણ વધારે છે. તે શક્તિ, દ્રષ્ટિ અને વિશ્વ સ્તરે ભારતના ઉદયનું પ્રતીક છે." તેણે ઉમેર્યું, "કાન્સમાં આ પહેરીને, હું આપણા વડાપ્રધાન નરેન્દ્રભાઈ મોદીનું સન્માન કરવા માંગતી હતી, જેમનું નેતૃત્વ ભારતને નવી ઊંચાઈઓ પર લઈ ગયું છે."
રૂચિએ આગળ કહ્યું, "વડાપ્રધાન મોદીએ વિશ્વભરમાં ભારતની છબીને ફરીથી વ્યાખ્યાયિત કરી છે. હું તે ગૌરવને મારી સાથે લઈ જવા માંગતી હતી. કાન્સમાં રાજસ્થાન અને ભારતનું પ્રતિનિધિત્વ કરવું એ મારા માટે માત્ર એક ક્ષણ નથી, તે વિશ્વને આપણે કોણ છીએ તે વિશેનો સંદેશ છે."
અભિનેત્રી રૂચિ ગુર્જરે તેના સત્તાવાર ઇન્સ્ટાગ્રામ એકાઉન્ટ પર કાન્સના રેડ કાર્પેટ પરથી તેના લુકની અદભુત તસવીરો શેર કરી છે. આ સાથે, તેણે કેપ્શનમાં લખ્યું છે - "ભારત માટે ગર્વની ક્ષણ." રૂચિ ગુર્જરનો આ પ્રયાસ કાન્સ જેવા આંતરરાષ્ટ્રીય મંચ પર ભારતીય સંસ્કૃતિ અને દેશભક્તિનું એક સુંદર પ્રદર્શન બની રહ્યો છે.