ભારતે ફરી એકવાર પાકિસ્તાનનો પર્દાફાશ કર્યો છે. વિદેશ મંત્રાલયના પ્રવક્તા રણધીર જયસ્વાલે બલુચિસ્તાન આર્મી સ્કૂલ બસ હુમલા અંગે પાકિસ્તાનના આરોપોને સ્પષ્ટપણે નકારી કાઢ્યા. તેમણે આ ઘટનામાં ભારતની સંડોવણીના પાકિસ્તાનના આરોપોને સખત શબ્દોમાં નકારી કાઢ્યા, અને આ દાવાઓને પાયાવિહોણા ગણાવ્યા

વિદેશ મંત્રાલયના પ્રવક્તા રણધીર જયસ્વાલે આરોપોને નકારી કાઢ્યા અને કહ્યું કે પાકિસ્તાન પોતાના મુદ્દાઓ પરથી ધ્યાન હટાવવા માટે આવી યુક્તિઓ અપનાવે છે. ભારતે પણ આ ઘટનામાં મૃત્યુ પામેલા લોકો પ્રત્યે શોક વ્યક્ત કર્યો હતો. પાકિસ્તાને આજે સવારે બલુચિસ્તાનના ખુઝદાર શહેરમાં આર્મી સ્કૂલ બસ પર થયેલા શંકાસ્પદ આત્મઘાતી હુમલામાં ભારતનો હાથ હોવાનો આરોપ લગાવ્યો હતો, જેમાં ચાર બાળકો માર્યા ગયા હતા.

વિદેશ મંત્રાલયે જણાવ્યું હતું કે આતંકવાદના વૈશ્વિક કેન્દ્ર તરીકેની પોતાની પ્રતિષ્ઠા પરથી ધ્યાન હટાવવા અને પોતાની નિષ્ફળતાઓ છુપાવવા માટે પાકિસ્તાન માટે તેના તમામ આંતરિક મુદ્દાઓ માટે ભારત પર દોષારોપણ કરવું સ્વાભાવિક બની ગયું છે. દુનિયાને છેતરવાનો આ પ્રયાસ નિષ્ફળ જવાનો છે

સ્થાનિક અધિકારીઓના જણાવ્યા અનુસાર, બસ બલુચિસ્તાન પ્રાંતના ખુઝદારમાં આર્મી પબ્લિક સ્કૂલ જઈ રહી હતી. રસ્તામાં, એક વાહને બસને જોરદાર ટક્કર મારી, જેના કારણે વિસ્ફોટ થયો. આ શાળા પાકિસ્તાન આર્મી કેડેટ્સને તાલીમ આપે છે અને પાકિસ્તાન મિલિટરી એકેડેમી, કાકુલ માટે ફીડર તરીકે સેવા આપે છે.