શ્રીનગર તા.૨૩: શ્રીનગરમાં ગુરુવારે ગરમીએ રેકોર્ડ બનાવ્‍યો. ૫૪ વર્ષ પછી અહીં મહત્તમ તાપમાન ૩૪.૪ ડિગ્રી સેલ્‍સિયસ નોંધાયું હતું. હવામાન વિભાગે ૨૩ મે માટે યલો એલર્ટ જારી કર્યું છે. જોકે, હવામાન વિભાગનું કહેવું છે કે ૨૪ થી ૨૬ મે સુધી ગરમીથી થોડી રાહત મળી શકે છે.

શ્રીનગરની સાથે, જમ્‍મુમાં પણ લોકો ગરમીથી પરેશાન હતા. અહીં દિવસનું તાપમાન ૩૮.૫ ડિગ્રી હતું. પવનને કારણે, બુધવારની સરખામણીમાં અહીં પારો ઘટયો અને તે ૨.૯ ડિગ્રી ઓછો રહ્યો. બુધવારે જમ્‍મુમાં મહત્તમ તાપમાન ૪૧.૪ ડિગ્રી હતું.

છેલ્લા ૫૪ વર્ષની વાત કરીએ તો, શ્રીનગરમાં ૫૪ વર્ષ પછી પારો ૩૪ ડિગ્રી સેલ્‍સિયસને વટાવી ગયો છે. અગાઉ, ૨૮ મે, ૧૯૭૧ ના રોજ, તાપમાન ૩૪.૩ ડિગ્રી નોંધાયું હતું. ખીણની સુંદરતા ઉપરાંત, અહીંનું હવામાન અન્‍ય રાજ્‍યોના -વાસીઓને આકર્ષે છે. ઉનાળાની રજાઓમાં કાશ્‍મીર ફરવા માટે એક ઉત્તમ સ્‍થળ છે. પરંતુ, હવે અહીં ગરમી પણ તેની અસર બતાવી રહી છે. બપોરે બજારમાં અને રસ્‍તા પર બહાર નીકળવું મુશ્‍કેલ બની રહ્યું છે.

ગુરુવારે, શ્રીનગરનું મહત્તમ તાપમાન સામાન્‍ય કરતા નવ ડિગ્રી વધુ હતું. તે જ સમયે, લઘુત્તમ તાપમાન ૧૫.૪ ડિગ્રી નોંધાયું હતું, જે સામાન્‍ય કરતા ૩.૪ ડિગ્રી વધુ છે. ગુલમર્ગમાં તાપમાન ૨૫.૪ ડિગ્રી નોંધાયું હતું, જે સામાન્‍ય કરતા ૮.૮ ડિગ્રી વધુ છે. તે જ સમયે, પહેલગામમાં તાપમાન ૨૭.૮ ડિગ્રી નોંધાયું હતું, જે સામાન્‍ય કરતા ૫.૬ ડિગ્રી વધુ છે.

કાશ્‍મીરના પ્રવેશદ્વાર કાઝીગુંડમાં ૩૩.૫ ડિગ્રી સેલ્‍સિયસ તાપમાન નોંધાયું હતું. ૧૯૫૬ પછી મે મહિનામાં આ ત્રીજું સૌથી વધુ તાપમાન છે. કોકરનાગમાં ૩૩.૩ ડિગ્રી તાપમાન નોંધાયું હતું, જે ૧૯૭૮ પછીનું સૌથી વધુ તાપમાન છે. અગાઉ, ૧૫ મે, ૨૦૦૧ના રોજ કોકરનાગમાં ૩૨.૬ ડિગ્રી તાપમાન નોંધાયું હતું. જમ્‍મુ વિભાગના બનિહાલમાં ૩૧ ડિગ્રી, બટોટમાં ૨૯.૨ ડિગ્રી, ભદરવાહમાં ૩૨.૧ ડિગ્રી, કટરા ૩૬.૨ ડિગ્રી તાપમાન નોંધાયું હતું.

૧૩૩ વર્ષમાં મે મહિનાનો ત્રીજો સૌથી ગરમ દિવસ

હવામાન વિભાગના જણાવ્‍યા અનુસાર, ગુરુવારે શ્રીનગરમાં ગરમીએ બે રેકોર્ડ બનાવ્‍યા હતા. ૧૩૩ વર્ષમાં આ મે મહિનાનો ત્રીજો સૌથી ગરમ દિવસ હતો. અગાઉ, ૨૪ મે, ૧૯૬૮ના રોજ ૩૬.૪ ડિગ્રી અને ૩૧ મે, ૧૯૫૬ના રોજ ૩૫.૦ ડિગ્રી સેલ્‍સિયસનું સૌથી વધુ તાપમાન નોંધાયું હતું.(૩૮.૫)