અમૃતસરમાં ઝેરી દારૂ પીવાથી 28 લોકોના મોત બાદ હવે લુધિયાણામાં દારૂ પીવાથી 3 લોકોના મોત થયા છે. બુધવારે મોડી રાત્રે એક યુવક રિંકુનું મૃત્યુ થયું હતું જ્યારે તેના બે મિત્રો, 40 વર્ષીય દેબી અને 45 વર્ષીય મંગુનું પણ CMCમાં સારવાર દરમિયાન મૃત્યુ થયું હતું. ત્રણેય મિત્રોએ નૂરવાલા રોડ પર સન્યાસ નગર વિસ્તારમાં એક દુકાનમાંથી દારૂ ખરીદ્યો હતો અને ખાલી પ્લોટમાં પીધો હતો. આના થોડા સમય પછી, ત્રણેયની હાલત બગડી ગઈ હતી.

સંબંધીઓને માહિતી મળતાં જ સિવિલ હોસ્પિટલ દોડી ગયા હતા પરંતુ ડોક્ટરોએ 40 વર્ષીય રિંકુને મૃત જાહેર કર્યો હતો, જ્યારે તેના બે મિત્રોની હાલત ગંભીર હોવાથી તેમને CMC રિફર કરવામાં આવ્યા હતા. ત્યા સારવાર દરમિયાન તેમનુ પણ મૃત્યુ થયું હતું.

ઘટનાની માહિતી મળતાં જ બસ્તી જોધેવાલ પોલીસ સ્ટેશને અજાણ્યા વિરુદ્ધ કેસ નોંધ્યો અને દારૂની દુકાન બંધ કરાવી દીધી. ગુરુવારે સવારે ડોક્ટરોના બોર્ડ દ્વારા ત્રણેયના મૃતદેહનું પોસ્ટમોર્ટમ કરવામાં આવ્યું હતું અને વિસેરા તપાસ માટે ખારર મોકલવામાં આવ્યો હતો.

પોલીસ અને વહીવટીતંત્ર તેને શંકાસ્પદ મૃત્યુ માની રહ્યા છે અને કહી રહ્યા છે કે મેડિકલ રિપોર્ટ આવ્યા પછી સત્ય બહાર આવશે, પરંતુ મૃતકના સંબંધીઓનો આરોપ છે કે ત્રણેયના મૃત્યુ ઝેરી દારૂ પીવાથી થયા છે કારણ કે દારૂ પીધા પછી ત્રણેયની તબિયત બગડી ગઈ હતી અને તેમના મોંમાંથી ફીણ નીકળી રહ્યા હતા.

દેવીના ભાઈ કરતાર સિંહે જણાવ્યું કે તેનો ભાઈ મજૂરી કામ કરતો હતો. તેમને 2 પુત્રીઓ અને 1 પુત્ર છે. લુધિયાણાની સિવિલ હોસ્પિટલના SMO ડૉ. હરપ્રીત સિંહે જણાવ્યું હતું કે મેડિકલ રિપોર્ટમાં જ ખબર પડશે કે તેમનું મૃત્યુ કેવી રીતે થયું. બસ્તી જોધેવાલ પોલીસ સ્ટેશનના SHO જસવીર સિંહે જણાવ્યું હતું કે વિસ્તારના રહેવાસીના નિવેદનના આધારે, અજાણ્યા વ્યક્તિઓ વિરુદ્ધ હત્યા ન ગણાતા સદોષ હત્યાનો કેસ નોંધવામાં આવ્યો છે.