વોશિંગટન : અમેરિકન રાષ્ટ્રપતિ ડોનાલ્ડ ટ્રમ્પે એપલના સીઈઓ ટિમ કૂકને કડક ચેતવણી આપતા કહ્યું હતું કે, અમેરિકામાં વેચાતા આઇફોન ફક્ત અમેરિકામાં જ બનાવવા જોઈએ - ભારતમાં કે અન્ય કોઈ દેશમાં નહીં, નહીં તો તેમણે ઓછામાં ઓછો 25% ટેક્સ ચૂકવવો પડશે. ટ્રુથ સોશિયલ પરની એક પોસ્ટમાં યુએસ રાષ્ટ્રપતિએ કહ્યું હતું કે, મેં ઘણા સમય પહેલા એપલના ટિમ કૂકને કહ્યું હતું કે મને આશા છે કે અમેરિકામાં વેચાતા તેમના આઇફોન ફક્ત અમેરિકામાં જ બનાવવામાં આવશે, ભારતમાં કે અન્ય કોઈ જગ્યાએ નહીં.

આ ત્યારે થયું જ્યારે ગયા અઠવાડિયે ટ્રમ્પે કહ્યું હતું કે તેમણે કૂકને ભારતમાં પ્લાન્ટ બનાવવાનો ઇનકાર કર્યો હતો. ટ્રમ્પે કહ્યું, "ગઈકાલે મને ટિમ કૂક સાથે થોડી સમસ્યા હતી." "તેઓ આખા ભારતમાં ઉત્પાદન કરી રહ્યા છે. હું નથી ઇચ્છતો કે તમે ભારતમાં ઉત્પાદન કરો. એપલ તેના મોટાભાગના આઇફોન ચીનમાં બનાવે છે અને યુએસમાં સ્માર્ટફોનનું ઉત્પાદન કરતું નથી. માર્ચ સુધીના 12 મહિનામાં, એપલે ભારતમાં $22 બિલિયનના મૂલ્યના આઇફોન એસેમ્બલ કર્યા, જે ગયા વર્ષની સરખામણીમાં ઉત્પાદનમાં લગભગ 60% વધારો કરે છે.

કંપનીએ $2.56 બિલિયનનું રોકાણ કર્યું છે

મીડિયા રિપોર્ટ્સ અનુસાર, એપલ તેના દેવનાહલ્લી પ્લાન્ટમાં $2.56 બિલિયનનું રોકાણ કરશે. તે દેવનાહલ્લીના ડોડ્ડાગોલ્લાહલ્લી અને ચપ્પરાદહલ્લી ગામોમાં ફેલાયેલું છે. જે બેંગલુરુના કેમ્પેગૌડા આંતરરાષ્ટ્રીય એરપોર્ટથી 34 કિમી દૂર છે. આ વર્ષે ડિસેમ્બર 2025 સુધીમાં 100,000 આઇફોન ઉત્પાદનનું લક્ષ્ય રાખવાની શક્યતા છે.

એસ એન્ડ પી ગ્લોબલ અનુસાર, 2024માં યુએસમાં આઇફોનનું વેચાણ 75.9 મિલિયન યુનિટ હતું, જેમાંથી માર્ચમાં ભારતમાંથી નિકાસ 31 લાખ યુનિટ હતી. એટલું જ નહીં, કેન્દ્રીય ઇલેક્ટ્રોનિક્સ મંત્રી અશ્વિની વૈષ્ણવે એપ્રિલમાં જાહેરાત કરી હતી. ગયા નાણાકીય વર્ષમાં ભારતમાંથી 1.5 લાખ કરોડ રૂપિયાના આઇફોન નિકાસ કરવામાં આવ્યા હતા.

તાઇવાની કંપની ફોક્સકોન અને ભારતીય કંપની ટાટા ઇલેક્ટ્રોનિક્સ ભારતમાં એપલ આઇફોનનું ઉત્પાદન કરે છે. એપલના સીઈઓ ટિમ કૂકે તાજેતરમાં કંપનીના ત્રિમાસિક પરિણામો પછી કહ્યું હતું કે જૂન ક્વાર્ટરમાં યુએસમાં વેચાયેલા મોટાભાગના આઇફોન ભારતમાં બનાવવામાં આવશે. કારણ કે એપલ પણ તેની સપ્લાય ચેઇનને ચીનથી દૂર ખસેડી રહી છે.