રાજકોટ: અરબી સમુદ્રમાં સર્જાયેલી હવામાન સિસ્ટમે અચાનક નાટકીય વળાંક લીધો છે. હવામાન નિષ્ણાત ગૌરવ રાણીંગા દ્વારા આપવામાં આવેલી લેટેસ્ટ અપડેટ મુજબ, 'વેલમાર્ક લો પ્રેશર' સિસ્ટમ છેલ્લા ૧૨ કલાકમાં દક્ષિણ-પૂર્વ દિશામાં ફંટાઈ ગઈ છે.

આજે સવારે આ સિસ્ટમ ૧૮° ઉત્તર અક્ષાંશથી ૧૬.૯° ઉત્તર અક્ષાંશ તરફ આગળ વધી રહી છે. યુનાઇટેડ સ્ટેટ્સની આંતરરાષ્ટ્રીય ચક્રવાત ટ્રેકિંગ એજન્સીઓ અનુસાર, આ સિસ્ટમ હવે મહારાષ્ટ્રના રત્નાગીરી નજીક ગણપતિપુલે આસપાસ લેન્ડફોલ (જમીન પર ટકરાવાની) થવાની શક્યતા છે. અત્યાર સુધી અનિશ્ચિતતા અને સસ્પેન્સથી ભરેલી અરબી સમુદ્રની આ સિસ્ટમે હવે વિપરીત દિશામાં ગતિ કરીને વધુ એક અપેક્ષિત વળાંક આપ્યો છે, જેના કારણે મહારાષ્ટ્રના દરિયાકાંઠા વિસ્તારોમાં તંત્રને એલર્ટ કરાયું છે.