(વિનોદ ગાલા દ્વારા)ભુજ તા.૨૪ :  વડાપ્રધાન શ્રી નરેન્દ્રભાઈ મોદી ભુજ ખાતેથી કંડલા પોર્ટને સંલગ્ન ઇન્ફ્રાસ્ટક્ચર અને પર્યાવરણ માટેના એક હજાર કરોડથી વધુના મહત્વાકાંક્ષી પ્રોજેક્ટ્સનો શિલાન્યાસ કરશે. આ પ્રોજેક્ટ્સ કંડલાને ભવિષ્યના ગ્રીન પોર્ટ મોડેલ તરીકે સ્થાપિત કરવા અને વધતી જતી કાર્ગો પરિવહન જરૂરિયાતોને પહોંચી વળવામાં મદદરૂપ થશે.

દીનદયાળ પોર્ટ ઓથોરિટી દ્વારા કંડલા ખાતે 10 મેગાવોટ ગ્રીન હાઇડ્રોજન ઉત્પાદન સુવિધાનું નિર્માણ કરવામાં આવશે, જેનો અંદાજિત ખર્ચ ₹150 કરોડ છે. આ સુવિધા સ્વચ્છ ઇંધણને પ્રોત્સાહન આપશે, બંદરના ઉત્સર્જનને ઘટાડશે અને ગ્રીન લોજિસ્ટિક્સને ટેકો આપશે. ઉત્પાદિત ગ્રીન હાઇડ્રોજનનો ઉપયોગ બંદરની કામગીરી, ગતિશીલતા, ઉદ્યોગ અને ઇંધણમાં સંભવિત મિશ્રણ માટે થશે. આ પ્રોજેક્ટ બિનપરંપરાગત ઉર્જાનો ઉપયોગ કરીને પાણીનું વિદ્યુત વિચ્છેદન અને વિશ્લેષણ કરશે. શૂન્ય કાર્બન ઉત્સર્જન સાથે, આ પ્રોજેક્ટ ભારતના લાંબાગાળાના પર્યાવરણને અનુકૂળ લક્ષ્યો સાથે સુસંગત છે, અને તે બાંધકામ, કામગીરી અને જાળવણીમાં પર્યાવરણને અનુકૂળ નોકરીઓનું સર્જન કરશે.

અન્ય પ્રોજેકટમાં કંડલા પોર્ટ પર બંદર અને સ્ટોરેજ વિસ્તાર વચ્ચે કાર્ગો પરિવહન માટે હાઇપરલૂપ પોડ ટેકનોલોજીનો વિકાસ કરવામાં આવશે, જેનો અંદાજિત ખર્ચ રૂ.400 કરોડ છે. આ LIM-આધારિત કાર્ગો મોબિલિટી સિસ્ટમ પોર્ટ માટે પરિવર્તનશીલ સાબિત થશે.આનાથી સલામતીમાં સુધારો, જાળવણી ખર્ચમાં ઘટાડો, માળખાકીય ખર્ચમાં ઘટાડો અને પર્યાવરણની દૃષ્ટિએ અનુકૂળતા જેવા ફાયદા થશે.

એક સાથે જ કંડલા ખાતે 3 રોડ ઓવર બ્રિજના બાંધકામ અને 6 લેન રસ્તાઓના અપગ્રેડેશન માટે રૂ.453 કરોડના પ્રોજેક્ટ્સ હાથ ધરવામાં આવશે. આમાં NH-8A (NH 141) પર KM 363.625 પર હાલના LC-1A ના બદલે 33.75 મીટર પહોળો અને 956.83 મીટર લાંબો ROB, NH-8A ને જોડતા LC-235 પર 4-લેન ROB (એપ્રોચ રોડ સહિત કુલ લંબાઈ 1170 મીટર) અને LC 236B ના બદલે 6-લેન ROB એપ્રોચ રોડ સહિત કુલ લંબાઈ 1100 મીટરનો સમાવેશ થાય છે. આ ઉપરાંત, હાલના કંડલા-ખારીરોહર રોડને 6 લેન રોડમાં 9 કિમી સુધી પહોળો કરી સુધારણા કરવામાં આવશે, તેમજ બર્થ નં. 11 અને 12 ના બેક અપ વિસ્તારમાં પ્લોટ, રસ્તાઓ, અને SWD (સ્ટ્રોમ વોટર ડ્રેનેજ) નું અપગ્રેડેશન કરવામાં આવશે. આ પ્રોજેક્ટ્સ વાહનોના ટ્રાફિકને ઝડપથી ખાલી કરાવીને બંદર બાઉન્ડ કાર્ગોની ટ્રાફિક હેન્ડલિંગ ક્ષમતામાં સુધારો કરશે અને ટર્નઅરાઉન્ડ સમય ઘટાડશે, જેથી બંદર કનેક્ટિવિટી પણ સારી બનશે.

વડાપ્રધાનશ્રી નરેન્દ્રભાઈ મોદી ભુજ ખાતેથી રૂ.૫૨ હજાર કરોડથી વધુના ૩૧ વિકાસકામોની ગુજરાતને આપશે ભેટ

ઉલ્લેખનીય છે કે, ભુજ ખાતે તા.૨૬મી મેના ભુજ-મિરઝાપર રોડ પર યોજાનારા કાર્યક્રમમાં વડાપ્રધાનશ્રી રૂ.૫૨,૯૫૩ કરોડના કુલ ૩૧ વિકાસકામોની ગુજરાતને ભેટ આપશે. કચ્છ, મોરબી, જામનગર, અમરેલી, જુનાગઢ, ગીર-સોમનાથ, અમદાવાદ, તાપી તથા મહીસાગર જિલ્લાને સમાવતા વિકાસકામોનું વડાપ્રધાનશ્રીના હસ્તે ઇ-લોકાર્પણ તથા ઇ-ખાતમૂહુર્ત કરાશે. આ કાર્યક્રમમાં રૂ.૨૨૯૨ કરોડના ૧૭ કામોના લોકાર્પણ તથા રૂ.૫૦,૬૬૧ કરોડના ૧૪ કામોના ખાતમૂહુર્ત સામેલ છે.