નવી દિલ્હી :ભ્રષ્ટાચારના આરોપમાં ધરપકડ કરાયેલા પંજાબ આમ આદમી પાર્ટીના ધારાસભ્ય રમણ અરોરાને શનિવારે (24 મે) જાલંધરની સ્થાનિક કોર્ટે 5 દિવસના પોલીસ રિમાન્ડ પર મોકલ્યા છે. ધારાસભ્યના વકીલ દર્શન સિંહના જણાવ્યા અનુસાર, વિજિલન્સ બ્યુરોએ કોર્ટ પાસેથી 10 દિવસના પોલીસ રિમાન્ડની માંગણી કરી હતી, જોકે, કોર્ટે ફક્ત 5 દિવસના રિમાન્ડ મંજૂર કર્યા હતા

ધારાસભ્ય રમણ અરોરાની ગયા શુક્રવારે (23 મે) જાલંધર મ્યુનિસિપલ કોર્પોરેશનના એક અધિકારી સાથે મળીને ભ્રષ્ટાચારના આરોપસર ધરપકડ કરવામાં આવી હતી. શુક્રવારે વિજિલન્સ બ્યુરોએ જલંધરમાં અરોરાના ઘરે દરોડો પાડ્યો હતો અને પૂછપરછ બાદ તેમને કસ્ટડીમાં લીધા હતા. ૫૪ વર્ષીય ધારાસભ્ય રમણ અરોરા જાલંધર સેન્ટ્રલ વિધાનસભા મતવિસ્તારનું પ્રતિનિધિત્વ કરે છે

બ્યુરોના પ્રવક્તાએ જણાવ્યું હતું કે 14 મેના રોજ, એન્જિનિયર્સ અને બિલ્ડીંગ ડિઝાઇનર્સ એસોસિએશન, જલંધરના ત્રણ પદાધિકારીઓ દ્વારા હસ્તાક્ષરિત એક સંયુક્ત ફરિયાદ પંજાબ વિજિલન્સ બ્યુરોને મળી હતી જેમાં આરોપ મૂકવામાં આવ્યો હતો કે જલંધર મ્યુનિસિપલ કોર્પોરેશનના આસિસ્ટન્ટ ટાઉન પ્લાનર (ATP) સુખદેવ વશિષ્ઠ ઘણીવાર તેમની પાસેથી ગેરકાયદેસર લાંચ માંગે છે. તેમણે કહ્યું કે આરોપ એ છે કે જ્યારે પણ તેઓ તેમના વિસ્તારમાં જાય છે, ત્યારે તેઓ લોકોને ધમકી આપે છે કે તેમની ઇમારતો સીલ કરી દેવામાં આવશે અને તોડી પાડવામાં આવશે.

આ સાથે, એવો પણ આરોપ મૂકવામાં આવ્યો હતો કે મહાનગરપાલિકાની અન્ય શાખાઓ દ્વારા મંજૂર કરાયેલી ઘણી ફાઇલો તેમની પાસે પેન્ડિંગ હતી. પ્રવક્તાએ જણાવ્યું હતું કે ફરિયાદની તપાસ કર્યા પછી, જાલંધર રેન્જના વિજિલન્સ બ્યુરોએ, એન્જિનિયર્સ અને બિલ્ડિંગ ડિઝાઇનર્સ એસોસિએશન, જાલંધરના પ્રમુખ સુનિલ કાત્યાલની ફરિયાદ પર, 14 મેના રોજ વશિષ્ઠ વિરુદ્ધ ભ્રષ્ટાચાર નિવારણ અધિનિયમની કલમ 7 હેઠળ એફઆઈઆર નોંધી હતી. આ પછી વિજિલન્સ બ્યુરોએ વશિષ્ઠની ધરપકડ કરી અને તેની તપાસ આગળ ધપાવી.

તેમણે જણાવ્યું હતું કે ધરપકડ કરાયેલા એટીપી સુખદેવ વશિષ્ઠના કાર્યાલય અને નિવાસસ્થાનની તપાસ દરમિયાન, ગુનાહિત દસ્તાવેજો અને ભૌતિક પુરાવા ઉપરાંત, તેમના અંગત કબજા અને કાર્યાલયના રેકોર્ડમાંથી અનધિકૃત બાંધકામ અને સંબંધિત બાબતો સંબંધિત સેંકડો સત્તાવાર નોટિસ મળી આવી હતી. પ્રવક્તાએ જણાવ્યું હતું કે તપાસમાં જાણવા મળ્યું છે કે ધરપકડ કરાયેલ અધિકારી, એક સ્થાનિક રાજકારણી સાથે મળીને, (જલંધર) શહેરના લોકો પાસેથી પૈસા પડાવવા અને ભ્રષ્ટાચારમાં સામેલ થવા માટે એક અનોખી પદ્ધતિ અપનાવી રહ્યો હતો.

દરમિયાન, પંજાબના મુખ્યમંત્રી ભગવંત માને એક વીડિયો સંદેશમાં સ્પષ્ટ કર્યું છે કે તેમની સરકાર કોઈપણ કિંમતે ભ્રષ્ટાચારને સહન કરશે નહીં. અરોરાનું નામ લીધા વિના, તેમણે સ્પષ્ટપણે કહ્યું કે જો કોઈ પક્ષ સભ્ય કે અન્ય કોઈ વ્યક્તિ આમાં સંડોવાયેલ જોવા મળશે તો તેની સામે કડક કાર્યવાહી કરવામાં આવશે