પુતિન ગાંડા થઇ ગયા છેઃ આ માણસને શું થઇ ગયું છે?
યુક્રેન ઉપર રૂસની એરસ્ટ્રાઇકથી ટ્રમ્પ ભડકયાઃ પુતિનને ઝાટકયા : રશિયાએ યુક્રેન પર અત્યાર સુધીનો સૌથી મોટો હવાઈ હુમલો કર્યો છેઃ રશિયાએ વિવિધ ભાગોમાં ૩૬૭ ડ્રોન અને મિસાઈલ છોડ્યા હતાઃ શહેરોમાં ભારે વિનાશ થયો હતો. કિવ સહિત ૩૦ થી વધુ શહેરો અને ગામડાઓને નુકસાન થયું છે. આ હુમલામાં ઓછામાં ઓછા ૧૨ લોકોએ જીવ ગુમાવ્યા હતા અને ઘણા લોકો ઘાયલ થયા હતા
ન્યુજર્સી તા.૨૬: યુક્રેન પર યુદ્ધ શરૂ થયા પછી રશિયાએ સૌથી મોટો હવાઈ હુમલો કર્યા પછી યુએસ પ્રમુખ ડોનાલ્ડ ટ્રમ્પ જેમણે અગાઉ રશિયન પ્રમુખ વ્લાદિમીર પુતિન પ્રત્યે નરમાશ દાખવી હતી હવે કડક મૂડમાં દેખાયા. ન્યુ જર્સીના મોરિસટાઉન એરપોર્ટ પર મીડિયા સાથે વાત કરતા ટ્રમ્પે રશિયન પ્રમુખ પર પ્રહાર કર્યો અને કહ્યું, ‘‘હું પુતિનથી ખુશ નથી. તેઓ બિલકુલ પાગલ થઈ ગયો છે. મને ખબર નથી કે આ માણસ ને શું થઇ ગયું છે.''
ડોનાલ્ડ ટ્રમ્પે પત્રકારો સાથે વાત કરતા કહ્યું, ‘‘હું પુતિનને ઘણા સમયથી ઓળખું છું, અમારા સારા સંબંધો છે. પરંતુ હવે તે રોકેટ ફાયર કરી રહ્યા છે, શહેરો પર હુમલો કરી રહ્યો છે, લોકોને મારી રહ્યા છે. મને આ બિલકુલ ગમતું નથી. મને ખબર નથી કે આ માણસ ને શું થઇ ગયું છે. અમે વાત કરી રહ્યા છીએ અને તેઓ કિવ અને અન્ય શહેરો પર મિસાઇલોનો વરસાદ કરી રહ્યો છે. કંઈક ખોટું છે. મને આ બધું બિલકુલ ગમતું નથી.''
આ સાથે, ટ્રમ્પે સોશિયલ મીડિયા પર પણ પોસ્ટ કરી. તેમણે લખ્યું, ‘‘મારા હંમેશા રશિયાના વ્લાદિમીર પુતિન સાથે ખૂબ સારા સંબંધો રહ્યા છે, પરંતુ તેમની સાથે કંઈક એવું બન્યું છે. તેઓ (પુતિન) એકદમ પાગલ થઈ ગયા છે. તેઓ કોઈ કારણ વગર ઘણા લોકોને મારી રહ્યા છે, અને હું ફક્ત સૈનિકો વિશે વાત નથી કરી રહ્યો. યુક્રેનિયન શહેરો પર કોઈ કારણ વગર મિસાઇલો અને ડ્રોન છોડવામાં આવી રહ્યા છે. મેં હંમેશા કહ્યું છે કે તેઓ ફક્ત યુક્રેનનો ટુકડો જ નહીં, પરંતુ સમગ્ર યુક્રેન ઇચ્છે છે, અને કદાચ તે સાચું સાબિત થઈ રહ્યું છે, પરંતુ જો તેઓ આમ કરે છે, તો તે રશિયાના પતન તરફ દોરી જશે.''
તેમણે આગળ કહ્યું, ‘‘એ જ રીતે, રાષ્ટ્રપતિ ઝેલેન્સકી જે રીતે વાત કરી રહ્યા છે તેનાથી તેમના દેશનું કોઈ ભલું નથી થઈ રહ્યું. તેમના મોંમાંથી નીકળતી દરેક વસ્તુ સમસ્યાઓ ઉભી કરે છે, મને તે ગમતું નથી, અને જો તેને બંધ કરવામાં આવે તો તે વધુ સારું રહેશે. આ એક એવું યુદ્ધ છે જે જો હું રાષ્ટ્રપતિ હોત તો કયારેય શરૂ ન થયું હોત. આ ઝેલેન્સકી, પુતિન અને બિડેનનું યુદ્ધ છે, ટ્રમ્પનું નહીં.ૅ હું ફક્ત તે મોટી અને કદરૂપી આગને ઓલવવામાં મદદ કરી રહ્યો છું જે ઘોર અસમર્થતા અને નફરત દ્વારા શરૂ કરવામાં આવી છે.''
તમને જણાવી દઈએ કે રશિયાએ યુક્રેન પર અત્યાર સુધીનો સૌથી મોટો હવાઈ હુમલો કર્યો. રશિયાએ યુક્રેનના વિવિધ ભાગોમાં ૩૬૭ ડ્રોન અને મિસાઇલો છોડ્યા. યુક્રેનિયન વાયુસેના અનુસાર, તેમણે ૪૫ મિસાઇલો તોડી પાડી અને ૨૬૬ ડ્રોનનો નાશ કર્યો, પરંતુ આ છતાં, ઘણા શહેરોમાં જબરદસ્ત વિનાશ થયો. કિવ સહિત ૩૦ થી વધુ શહેરો અને ગામડાઓને નુકસાન થયું છે. આ હુમલામાં ઓછામાં ઓછા ૧૨ લોકોએ જીવ ગુમાવ્યા છે અને ઘણા ઘાયલ થયા છે.
યુક્રેનના રાષ્ટ્રપતિ વોલોડીમીર ઝેલેન્સકીએ આંતરરાષ્ટ્રીય સમુદાય, ખાસ કરીને અમેરિકાના પ્રતિભાવ પર ઊંડી નિરાશા વ્યક્ત કરી છે. તેમણે કહ્યું, ‘‘શનિવાર હોય કે રવિવાર, દુનિયા રજા પર જઈ શકે છે, પરંતુ યુદ્ધ ચાલુ રહે છે. તેને અવગણી શકાય નહીં. અમેરિકાનું મૌન અને દુનિયાનું મૌન પુતિનને વધુ બર્બરતા કરવા માટે પ્રેરણા આપી રહ્યું છે.'' જ્યાં સુધી રશિયન સરકાર પર ગંભીર દબાણ નહીં આવે, ત્યાં સુધી આવા હુમલા ચાલુ રહેશે.
ટ્રમ્પે શાંતિના પ્રયાસો કર્યા, પરંતુ પુતિને વચન તોડ્યું
નોંધનીય છે કે ડોનાલ્ડ ટ્રમ્પે તાજેતરમાં યુદ્ધવિરામ લાવવાના પ્રયાસમાં પુતિન સાથે વાતચીત કરી હતી, જે બે કલાકથી વધુ સમય સુધી ચાલી હતી. આ ઉપરાંત, તેમણે ઝેલેન્સકીનો પણ સંપર્ક કર્યો હતો અને બંને પક્ષોને વાટાઘાટોના ટેબલ પર લાવવાનો પ્રયાસ કર્યો હતો. જોકે, પુતિન તુર્કીમાં પ્રસ્તાવિત શાંતિ મંત્રણામાં હાજરી ન આપતાં આ પ્રયાસોને ફટકો પડ્યો હતો. આંતરરાષ્ટ્રીય સમુદાયની વારંવાર વિનંતીઓ છતાં, રશિયાએ તેના હુમલાઓ વધુ તીવ્ર બનાવ્યા છે.(૩૮.૧૦)
(9:27 AM IST)
છેલ્લા 8 દિવસમાં સૌથી લોકપ્રિય 
