નવી દિલ્હી: વડાપ્રધાન નરેન્દ્ર મોદીએ શુક્રવારે જણાવ્યું હતું કે, ભારતનો પૂર્વોત્તર પ્રદેશ હવે "સરહદી પ્રદેશ" નથી, પરંતુ "વૃદ્ધિનો અગ્રદૂત" છે. તેમણે આઠ રાજ્યોના આ પ્રદેશમાં રોકાણ માટે આહ્વાન કર્યું હતું. નવી દિલ્હીમાં યોજાયેલી 'રાઇઝિંગ નોર્થઇસ્ટ સમિટ'નું ઉદ્ઘાટન દરમિયાન વડાપ્રધાને જણાવ્યું હતું કે, આ પ્રદેશ આર્થિક અને ઔદ્યોગિક તકોની વિશાળ શ્રેણી પ્રદાન કરે છે. તેમણે કહ્યું કે ભારતને પૂર્વોત્તર માટે "નવા સપના" છે, અને ઉમેર્યું હતું કે, આગામી દાયકામાં આ પ્રદેશ દક્ષિણપૂર્વ એશિયા સાથેના વેપાર માટેના પ્રવેશદ્વાર તરીકે ઉભરી આવશે.

 

 

આ કાર્યક્રમ ડિરેક્ટોરેટ જનરલ ઓફ ફોરેન ટ્રેડ દ્વારા ૧૭ મેના રોજ બાંગ્લાદેશ સાથેના ભૂમિ બંદરો બંધ કરવાના આદેશના પગલે યોજાયો છે. અધિકારીઓએ જણાવ્યું હતું કે, આ નિર્ણય પૂર્વોત્તરને તેની પોતાની સપ્લાય ચેઇનની વ્યાપારી સંભાવના વિકસાવવા માટે સમાન તક પૂરી પાડશે અને સ્પર્ધાત્મક રીતે ઉત્પાદન કરવા માટે પ્રોત્સાહન આપશે.

 

 

વડાપ્રધાને પ્રદેશની વિવિધતાને શ્રદ્ધાંજલિ અર્પણ કરતાં જણાવ્યું હતું કે, "ભારતને વિશ્વનો સૌથી વિવિધતા ધરાવતો દેશ કહેવામાં આવે છે, પરંતુ આપણો પૂર્વોત્તર આપણા વિવિધ રાષ્ટ્રનો સૌથી વિવિધતા ધરાવતો ભાગ છે. વેપારથી લઈને પરંપરા સુધી, કાપડથી લઈને પ્રવાસન સુધી, પૂર્વોત્તરની વિવિધતા પ્રદેશની ખૂબ મોટી શક્તિ છે." તેમણે બાયો-ઇકોનોમી, વાંસ, ચા ઉત્પાદન, પેટ્રોલિયમ, રમતગમત અને ઇકો-ટુરિઝમને કેટલાક એવા ક્ષેત્રો તરીકે ગણાવ્યા જ્યાં આ પ્રદેશ ઉભરતું હબ છે.

 

 

વડાપ્રધાન મોદીએ પૂર્વોત્તરને 'અષ્ટ લક્ષ્મી' અથવા દેવી લક્ષ્મીના આઠ સ્વરૂપો તરીકે વર્ણવતા કહ્યું કે, "પૂર્વોત્તર ઊર્જાનું પાવરહાઉસ છે." તેમણે ભારપૂર્વક જણાવ્યું કે, આગામી દાયકામાં પૂર્વોત્તર આસિયાન બ્લોક સાથેના વેપાર માટે એક મજબૂત સેતુ બનશે. તેમણે જાહેરાત કરી કે ભારત મ્યાનમાર, થાઈલેન્ડ, વિયેતનામ અને લાઓસને ભારત સાથે સીધા જોડવા માટે પ્રોજેક્ટ્સ પર કામ કરી રહ્યું છે. "આ પ્રોજેક્ટ્સ પૂર્વોત્તરને ઇન્ડો-પેસિફિક દેશોમાં નવી વ્યાપારી ઓળખ આપશે," તેમણે ઉમેર્યું.

વડાપ્રધાને કહ્યું કે, "પૂર્વનો અર્થ ફક્ત દિશા નથી. તેનો અર્થ છે, સશક્ત કરવું  (એમપાવર), કાર્ય કરવું (એક્ટ), મજબૂત કરવું (સ્ટ્રેન્ધન) અને પરિવર્તન કરવું (ટ્રાન્સફોર્મ). આ પૂર્વીય ભારત માટે અમારી સરકારની નીતિ છે." 

 

 

તેમણે જણાવ્યું કે, છેલ્લા એક દાયકામાં કેન્દ્રીય મંત્રીઓએ આ પ્રદેશની ૭૦૦ થી વધુ વખત મુલાકાત લીધી છે. "તેઓએ પૂર્વોત્તરના લોકોની આંખોમાં આશા જોઈ અને તેઓએ તે વિશ્વાસને વિકાસના સિદ્ધાંતોમાં રૂપાંતરિત કર્યો. અમે લુક ઈસ્ટ થી એક્ટ ઈસ્ટ મંત્ર તરફ આગળ વધ્યા અને તેનું પરિણામ આપણે આ પ્રદેશમાં જોઈ રહ્યા છીએ," એમ તેમણે ઉમેર્યું.

 

 

આ કાર્યક્રમમાં આસામના મુખ્યમંત્રી હિમંતા બિસ્વા સરમા, મેઘાલયના કોનરાડ સંગમા, ત્રિપુરાના માણિક સાહા, મિઝોરમના લાલદુહોમા અને સિક્કિમના પ્રેમ સિંહ તમાંગ સહિત પૂર્વોત્તર રાજ્યોના મુખ્યમંત્રીઓ હાજર રહ્યા હતા. 

 

 

નોંધનીય છે કે, માર્ચ મહિનામાં બાંગ્લાદેશના મુખ્ય સલાહકાર મોહમ્મદ યુનુસે આ પ્રદેશને "ભૂમિબદ્ધ" ગણાવ્યો હતો અને ચીનને પ્રદેશના વ્યાપારી ક્ષેત્રમાં પ્રવેશ કરવામાં મદદ કરી શકે તેવા "મહાસાગરના રક્ષક" તરીકે તેમના દેશની ઓફર કરી હતી, જેના પર ભારતે સખત વાંધો ઉઠાવ્યો હતો.