ગાંધીનગર : આવતીકાલે સવારે ગાંધીનગર શહેરમાં દેશના વડાપ્રધાન નરેન્દ્રભાઈ મોદીની ઉપસ્થિતિમાં યોજાનાર ભવ્ય 'સિંદૂર સન્માન યાત્રા'ની પૂર્વ તૈયારીઓના ભાગરૂપે, આજે ગૃહ રાજ્ય મંત્રી હર્ષ સંઘવીએ યાત્રાના રૂટનું ઝીણવટભર્યું નિરીક્ષણ કર્યું હતું. આ નિરીક્ષણ દરમિયાન યાત્રાના સુચારુ આયોજન અને સુરક્ષા વ્યવસ્થાની સમીક્ષા કરવામાં આવી હતી.
ગૃહ રાજ્ય મંત્રી હર્ષ સંઘવી સાથે ગાંધીનગર મહાનગરપાલિકાના મેયર, સ્થાનિક ધારાસભ્ય, જિલ્લા કલેક્ટર, ગાંધીનગર મહાનગરપાલિકાના કમિશનર તેમજ ગાંધીનગર એસ.પી. સહિતના ઉચ્ચ અધિકારીઓ અને પદાધિકારીઓ પણ ઉપસ્થિત રહ્યા હતા. સૌએ મળીને યાત્રાના રૂટ પરની વ્યવસ્થાઓ, સુરક્ષા પ્રોટોકોલ અને અન્ય આનુષંગિક બાબતોની ચકાસણી કરી હતી.
વડાપ્રધાનની આ યાત્રાને ભવ્ય અને યાદગાર બનાવવા માટે તંત્ર દ્વારા સઘન તૈયારીઓ ચાલી રહી છે. 'સિંદૂર સન્માન યાત્રા' વડાપ્રધાનના 'ઓપરેશન સિંદૂર'ની સફળતા અને તેનાથી દેશને મળેલા ગૌરવની ઉજવણીનો એક ભાગ છે, જેમાં મોટી સંખ્યામાં લોકો ઉમટી પડે તેવી સંભાવના છે.