પટના :જન સૂરજ પાર્ટીના સ્થાપકે કહ્યું છે કે તેઓ મુખ્યમંત્રી બનવા માટે નથી ફરી રહ્યા, મુખ્યમંત્રી બનવું એ એક નાનું સ્વપ્ન છે. તેમનું સ્વપ્ન છે કે તેમના જીવનમાં એક એવો દિવસ આવે જ્યારે પંજાબ, હરિયાણા, ગુજરાત અને મહારાષ્ટ્રના લોકો નોકરી માટે બિહાર આવે. પછી તેઓ સ્વીકારશે કે બિહારમાં વિકાસ થયો છે. બિહાર બદલાવ યાત્રા દરમિયાન સિવાનના રઘુનાથપુરમાં એક જાહેર સભાને સંબોધતા પ્રશાંત કિશોરે કહ્યું કે આ વખતે જાતિ, ધર્મ, મફત રાશન અને પૈસાને બાજુ પર રાખીને તમારા બાળકોના શિક્ષણ અને તેમની આજીવિકા માટે મતદાન કરો.

પ્રશાંત કિશોરે કહ્યું- “કેટલાક લોકોને લાગે છે કે હું અહીં મુખ્યમંત્રી બનવા આવ્યો છું. અરે ભાઈ, તમે મને ઓળખતા નથી. હું આટલું નાનું સ્વપ્ન લઈને નથી જન્મ્યો. હું મુખ્યમંત્રી બનવા માટે આટલી મહેનત નથી કરી રહ્યો. હું સખત મહેનત કરી રહ્યો છું, મને પરસેવો પડી રહ્યો છે કારણ કે હું આ સ્વપ્ન લઈને આવ્યો છું કે હું મારા જીવનમાં એક એવો દિવસ જોઉં જ્યારે હરિયાણા, પંજાબ, ગુજરાત, મહારાષ્ટ્રના લોકો નોકરી માટે બિહાર આવશે, ત્યારે જ હું માનીશ કે બિહારમાં વિકાસ થયો છે.”

પ્રશાંત કિશોરે પોતાના પરિવાર, ઉછેર અને ચૂંટણી રણનીતિકાર તરીકેની કારકિર્દી વિશે વાત કરતા લોકોને કહ્યું કે છેલ્લા 10 વર્ષમાં તેમણે ફક્ત એક કે બે નહીં પરંતુ 10 નેતાઓને મુખ્યમંત્રી બનવામાં મદદ કરી છે. નેતા જીત્યા પણ લોકો જ્યાં હતા ત્યાં જ રહ્યા. મેં નેતાઓ અને પાર્ટીને ઘણી સલાહ આપી છે, હવે હું એકવાર બિહારના લોકોને તમારા બાળકોનું જીવન બદલવાની સલાહ આપવા આવ્યો છું. પ્રશાંતે લાલુ યાદવ, નીતિશ કુમાર અને નરેન્દ્રભાઈ  મોદીના નામ લીધા અને કહ્યું કે તમે અત્યાર સુધી જે કંઈ પણ મત આપ્યો છે, તે તમને મળી ગયું છે. તમે બાળકોને મત આપ્યો નથી, તો આ વખતે બાળકોને મત આપો.