ગુમી : દક્ષિણ કોરિયાના ગુમી ખાતે ચાલી રહેલી 26મી એશિયન એથ્લેટિક્સ ચેમ્પિયનશિપમાં ભારતે ત્રીજા દિવસે અદભૂત પ્રદર્શન કરીને 3 ગોલ્ડ સહિત કુલ 6 મેડલ પોતાના નામે કર્યા છે. આ સાથે ભારતની કુલ મેડલ ટેલી 14 પર પહોંચી ગઈ છે, જે દેશ માટે ગર્વની ક્ષણ છે. ખાસ કરીને જ્યોતિ યારાજી અને અવિનાશ સાબળે વ્યક્તિગત ઇવેન્ટ્સમાં સુવર્ણ પદક જીતીને ભારતનું નામ રોશન કર્યું છે.
અવિનાશ સાબળનો ઐતિહાસિક ગોલ્ડ:
પુરુષોની 3,000 મીટર સ્ટીપલચેઝ (અવરોધ દોડ) માં ભારતના સ્ટાર એથ્લીટ અવિનાશ સાબળે શાનદાર પ્રદર્શન કરતા 8 મિનિટ, 20.92 સેકન્ડના સિઝનના શ્રેષ્ઠ સમય સાથે ગોલ્ડ મેડલ જીત્યો છે. આ વિજય સાથે, બે વખતના ઓલિમ્પિયન અને વર્તમાન એશિયન ગેમ્સ ચેમ્પિયન સાબળ એશિયન ચેમ્પિયનશિપમાં સ્ટીપલચેઝમાં ગોલ્ડ જીતનાર છેલ્લા 36 વર્ષમાં પ્રથમ ભારતીય પુરુષ બન્યા છે. આ સિદ્ધિ હાંસલ કરનારા તેઓ હરબંસ સિંહ (1975) અને દીના રામ (1989) પછી માત્ર ત્રીજા ભારતીય પુરુષ એથ્લીટ છે. 2019 માં દોહામાં સિલ્વર મેડલ જીતનારા સાબળ આ ઇવેન્ટમાં રાષ્ટ્રીય રેકોર્ડ ધારક પણ છે.
જ્યોતિ યારાજીનો સતત બીજો ગોલ્ડ:
અવિનાશ સાબળના પરાક્રમ બાદ, ભારતની સૌથી ઝડપી મહિલા હર્ડલર જ્યોતિ યારાજીએ મહિલાઓની 100 મીટર હર્ડલ્સ (અવરોધ દોડ) માં પોતાનો દબદબો જાળવી રાખ્યો. તેણે 12.96 સેકન્ડનો સમય નોંધાવીને ચેમ્પિયનશિપનો નવો રેકોર્ડ બનાવ્યો અને સતત બીજો ગોલ્ડ મેડલ પોતાના નામે કર્યો. જ્યોતિએ રેસમાં અંતિમ ક્ષણોમાં જોરદાર ગતિ પકડીને વિજય હાંસલ કર્યો અને ઇતિહાસ ફરીથી લખ્યો.
મહિલા 4x400 મીટર રિલે ટીમનો સુવર્ણ વિજય:
જ્યોતિ અને સાબળે જે લય સેટ કરી હતી, તેને આગળ વધારતા જિસ્ના મેથ્યુ, રૂપલ ચૌધરી, કુંજા રાજિથા અને સુભા વેંકટેશનની મહિલા 4x400 મીટર રિલે ટીમે સિઝનના શ્રેષ્ઠ સમય 3:34.18 સાથે સુવર્ણ પદક જીત્યો. આ મેડલ સાથે, ભારતે ખંડીય ચેમ્પિયનશિપના ત્રીજા દિવસે પણ પોતાનો દબદબો જાળવી રાખ્યો. આ ઇવેન્ટમાં ભારતનો આ કુલ 10મો ગોલ્ડ મેડલ છે, જે રિલે રેસમાં ભારતની સતત શ્રેષ્ઠતા દર્શાવે છે.
આજના દિવસના પ્રદર્શન સાથે, ભારતે કુલ 3 ગોલ્ડ, 2 સિલ્વર અને 1 બ્રોન્ઝ મેડલ જીત્યા છે, જેનાથી ચેમ્પિયનશિપમાં ભારતનો કુલ મેડલ ટેલી 14 પર પહોંચી ગયો છે. ભારતીય એથ્લેટ્સનું આ પ્રદર્શન આગામી આંતરરાષ્ટ્રીય સ્પર્ધાઓ માટે શુભ સંકેત આપી રહ્યું છે.