લખનૌ: આવકવેરા વિભાગના મુખ્યાલયમાં બે અધિકારીઓ વચ્ચે ગંભીર ઘર્ષણની ઘટના સામે આવી છે. આઈઆરએસ અધિકારી ગૌરવ ગર્ગ પર તેમના વરિષ્ઠ અધિકારી, સહાયક કમિશનર યોગેન્દ્ર કુમાર મિશ્ર દ્વારા હુમલો કરવામાં આવ્યો હોવાનું જાણવા મળ્યું છે. આ ઘટનામાં ગૌરવ ગર્ગ ગંભીર રીતે ઘાયલ થયા હતા અને તેમને તાત્કાલિક સારવાર માટે નજીકની સિવિલ હોસ્પિટલમાં ખસેડવામાં આવ્યા હતા. હોસ્પિટલમાં તેમનું તબીબી પરીક્ષણ કરવામાં આવ્યું અને હાલ તેમની સ્થિતિ પર નજર રખાઈ રહી છે. બંને અધિકારી વચ્ચે પહેલા ખૂબ બોલાચાલી થઈ, પછી બેફામ મારામારી થઈ હતી તેવી ચર્ચા છે.

જાણવા મળ્યું છે કે આ ઘટના આવકવેરા વિભાગના લખનૌ સ્થિત મુખ્યાલયમાં બની, જ્યાં ગૌરવ ગર્ગને ઓફિસના એક રૂમમાં બંધ કરીને માર મારવામાં આવ્યો હતો. હુમલાનું ચોક્કસ કારણ હજુ સુધી સ્પષ્ટ થયું નથી, પરંતુ પ્રાથમિક માહિતી અનુસાર આ ઘટના વિભાગીય તનાવ અને અધિકારીઓ વચ્ચેના વ્યક્તિગત મનમેળના અભાવને કારણે બની હોવાનું મનાય છે. કેટલાક સૂત્રોના જણાવ્યા અનુસાર, આ મામલો વરિષ્ઠ અને કનિષ્ઠ અધિકારીઓ વચ્ચેના મતભેદો સાથે જોડાયેલો હોઈ શકે છે.

ગૌરવ ગર્ગે આ ઘટના અંગે હજરતગંજ પોલીસ સ્ટેશનમાં યોગેન્દ્ર કુમાર મિશ્ર વિરુદ્ધ લેખિત ફરિયાદ નોંધાવી છે. પોલીસે આ ફરિયાદના આધારે તપાસ શરૂ કરી દીધી છે અને આગળની કાર્યવાહી હાથ ધરવામાં આવી રહી છે. ગૌરવ ગર્ગની પત્ની રવીના ત્યાગી, ૨૦૧૪ બેચના આઈપીએસ અધિકારી છે, અને લખનૌમાં ફરજ બજાવે છે.

આ ઘટનાએ આવકવેરા વિભાગના આંતરિક વાતાવરણ અને અધિકારીઓ વચ્ચેના સંબંધો પર સવાલો ઉભા કર્યા છે. સોશિયલ મીડિયા પર પણ આ મામલે ચર્ચાઓ શરૂ થઈ છે, જેમાં ઘણા લોકો આ ઘટનાને નિંદનીય ગણાવી રહ્યા છે. પોલીસ તપાસ બાદ આ મામલે વધુ વિગતો સામે આવે તેવી શક્યતા છે.