નવી દિલ્હી : આઠમા, પગારપંચનો લાભ ક્યારે મળશે આ બાબતે ભારે ઉત્સુકતા જોવા મળે છે જો 8મા પગાર પંચની ભલામણો સમયસર લાગુ કરવામાં નહીં આવે તો 1 જાન્યુઆરી, 2026 ના રોજ અથવા તે પછી નિવૃત્ત થનારા કેન્દ્ર સરકારી કર્મચારીઓને સુધારેલા પગાર અને પેન્શન લાભોમાં વિલંબનો સામનો કરવો પડી શકે છે.

હકીકતમાં સરકારે 16 જાન્યુઆરી, 2025 ના રોજ 8મા પગાર પંચની રચનાને મંજૂરી આપી હતી, પરંતુ હજુ સુધી તેના અધ્યક્ષની નિમણૂક કરી નથી. તેમજ તેની સંદર્ભ શરતોને પણ અંતિમ સ્વરૂપ આપવામાં આવ્યું નથી. આ સ્થિતિમાં સ્વાભાવિક રીતે જ પ્રશ્ન ઊભો થાય છે કે શું તેની ભલામણો સમયસર લાગુ કરવામાં આવશે.

પાછલા પગાર પંચની ભલામણોને લાગુ કરવામાં વિલંબ થયો હતો
એપ્રિલ, 2024 માં એક પરિપત્ર બહાર પાડવામાં આવ્યો હતો જેમાં ડેપ્યુટેશનના આધારે લગભગ 35 જગ્યાઓ ભરવાની વાત કરવામાં આવી હતી, ત્યારબાદ આ વિલંબ સૌપ્રથમ પ્રકાશમાં આવ્યો હતો.

આ વહીવટી પ્રગતિ પછી પણ, કોઈ ઔપચારિક નિમણૂકની જાહેરાત કરવામાં આવી નથી. વધુમાં, કમિશને હજુ સુધી તેનું સક્રિય કાર્ય શરૂ પણ કર્યું નથી. અગાઉના કમિશનની ભલામણોને લાગુ કરવામાં 12 થી 18 મહિનાનો સમય લાગ્યો હતો. આ સ્થિતિમાં, 1 જાન્યુઆરી, 2026ની સમયમર્યાદા પૂરી થવાની શક્યતા ઓછી દેખાય છે.

8મા પગાર પંચમાં વિલંબ કેમ થઈ શકે?
અહેવાલ મુજબ, સંરક્ષણ, ગૃહ અને કર્મચારી મંત્રાલયો માર્ચ 2025 સુધી તેના ડ્રાફ્ટની સમીક્ષા કરી રહ્યા હતા. જો કે એક વરિષ્ઠ સરકારી અધિકારીએ પાછળથી સંકેત આપ્યો કે ભલામણોનો નાણાકીય અમલીકરણ ફક્ત કેન્દ્રીય બજેટ 2026-27 માં જ પ્રતિબિંબિત થશે, જે દર્શાવે છે કે તેના અમલીકરણમાં વિલંબ થઈ શકે છે.