કૌશલ સાવજાણી દ્વારા, જામ ખંભાળિયા : દેવભૂમિ દ્વારકા જિલ્લાના દરિયાકાંઠા વિસ્તારોમાં ડ્રગ્સની ઘૂસણખોરી રોકવા માટે પોલીસ દ્વારા ચલાવવામાં આવતા સઘન અભિયાન અંતર્ગત, કલ્યાણપુર પોલીસે એક મોટી સફળતા હાંસલ કરી છે. રાજકોટ રેન્જના આઈ.જી.પી. અશોકકુમાર યાદવ અને દેવભૂમિ દ્વારકા જિલ્લા પોલીસ અધિક્ષક નિતેશ પાંડેયની સૂચના મુજબ તથા દ્વારકા વિભાગના નાયબ પોલીસ અધિક્ષક સાગર રાઠોડના માર્ગદર્શન હેઠળ, કલ્યાણપુર પોલીસે ગોજીનેશ ગામની સીમના ગુગળીયા બારૂના દરિયાકાંઠેથી ₹૬,૬૧,૯૫,૦૦૦/- (છ કરોડ, એકસઠ લાખ, પંચાણુ હજાર રૂપિયા) ની કિંમતનો ૧૩.૨૩૯ કિલોગ્રામ બિનવારસી ચરસનો જથ્થો શોધી કાઢ્યો છે.
ફૂટ પેટ્રોલિંગ દરમિયાન મળી આવ્યો ડ્રગ્સનો મોટો જથ્થો
આ ઘટના ગત તારીખ ૨૯ મે, ૨૦૨૫ ના રોજ બની હતી. ભાટિયા આઉટપોસ્ટ હેઠળ આવતા દરિયાકાંઠા વિસ્તારમાં ફૂટ પેટ્રોલિંગ દરમિયાન, કલ્યાણપુર પોલીસ સ્ટેશનના પોલીસ ઇન્સ્પેક્ટર એમ.ડી. મકવાણાના માર્ગદર્શન હેઠળની ટીમને આ સફળતા મળી. એ.એસ.આઈ. કરશનભાઈ ગોગનભાઈ ચેતરીયા, પોલીસ કોન્સ. નિલેશભાઈ રમેશભાઈ ચાવડા, ભીખાભાઈ નગાભાઈ ગાગીયા (SOG, દેવભૂમિ દ્વારકા) સહિતના સ્ટાફના માણસો ગોજીનેશ ગામની સીમના ગુગળીયા બારૂના દરિયાકાંઠા પર તપાસ કરી રહ્યા હતા.
આ દરમિયાન, તેમને બિનવારસી કાપડની બેગ જેવા પેકિંગમાં અલગ અલગ કુલ-૧૦ પેકેટ મળી આવ્યા હતા. તપાસ કરતા આ પેકેટોમાંથી કુલ ૧૩.૨૩૯ કિલોગ્રામ વજનનો માદક પદાર્થ ચરસ મળી આવ્યો હતો, જેની આંતરરાષ્ટ્રીય બજાર કિંમત ₹૬,૬૧,૯૫,૦૦૦/- અંદાજવામાં આવી છે. પોલીસે આ મુદામાલ કબ્જે કરીને કલ્યાણપુર પોલીસ સ્ટેશન ખાતે નશાબંધી કાયદા હેઠળ ગુનો નોંધી કાયદેસરની કાર્યવાહી હાથ ધરી છે.
કાર્યવાહી કરનાર ટીમ અને જાહેર જનતાને અપીલ
આ મહત્વપૂર્ણ કામગીરીમાં કલ્યાણપુર પોલીસ સ્ટેશનના પોલીસ ઇન્સ્પેક્ટર એમ.ડી. મકવાણા, પો. સબ ઇન્સ્પેક્ટર કે.પી. ઝાલા, એ.એસ.આઈ. કરશનભાઈ ગોગનભાઈ ચેતરીયા, એ.એસ.આઈ. ચંદ્રસિંહ ગુમાનસિંહ જાડેજા, એ.એસ.આઈ ભીખાભાઈ નગાભાઈ ગાગીયા (SOG), પો.હેડ કોન્સ. રામશીભાઈ વરવાભાઈ પીંડારીયા, પો.હેડ કોન્સ. નેભાભાઈ અરજણભાઈ બારડ, પો.હેડ કોન્સ. દિલીપભાઈ મનસુખભાઈ બાવળીયા, પો.કોન્સ. ભરતભાઈ વેજાણંદભાઈ ગોજીયા, પો.કોન્સ. નિલેશભાઈ રમેશભાઈ ચાવડા, ડ્રા.પો.કોન્સ. ભરતભાઈ દેવાભાઈ ભોચીયા અને ડ્રા.પો.કોન્સ. જયસુખભાઈ ગોરધનભાઈ પરમાર સહિતના પોલીસ સ્ટાફે સક્રિય ભૂમિકા ભજવી હતી.
પોલીસ તંત્ર દ્વારા જાહેર જનતાને અપીલ કરવામાં આવી છે કે, જો તમારી આજુબાજુના દરિયાકિનારે કોઈ શંકાસ્પદ બિનવારસી ચીજ વસ્તુ મળી આવે કે દેખાય તો તુરંત જ નજીકના પોલીસ સ્ટેશન અથવા નીચે આપેલા નંબરો પર જાણ કરવી:
 * કલ્યાણપુર પોલીસ સ્ટેશન: ૬૩૫૯૬ ૨૭૯૩૫
 * એસ.ઓ.જી. દેવભૂમિ દ્વારકા: ૭૨૦૨૦ ૮૮૧૦૦
 * જિલ્લા કંટ્રોલ રૂમ દેવભૂમિ દ્વારકા: ૭૪૩૩૯ ૭૫૯૧૪
આ કાર્યવાહી ગુજરાતના દરિયાકાંઠા પરથી થતી ડ્રગ્સની હેરાફેરી રોકવા માટે પોલીસની પ્રતિબદ્ધતા દર્શાવે છે.