નવી દિલ્હી, શનિવાર, 31 મે, 2025: કોંગ્રેસ મહાસચિવ પ્રિયંકા ગાંધી વાડરાએ આજે ભારતીય અર્થવ્યવસ્થાની સ્થિતિ અંગે ભાજપ સરકાર પર આકરા પ્રહારો કર્યા હતા. તેમણે કહ્યું કે, નાણાકીય વર્ષ 2024-25 માં દેશનો આર્થિક વિકાસ દર 6.5% રહ્યો છે, જે કોરોના મહામારી પછીનો સૌથી ધીમો દર છે. પ્રિયંકા ગાંધીએ કટાક્ષ કરતા જણાવ્યું કે, આર્થિક પ્રગતિ વિના 'વિકસિત ભારત' ની વાતો માત્ર હવા-હવાઈ છે.
સરકારી આંકડાઓ અનુસાર, નાણાકીય વર્ષ 2024-25 ના જાન્યુઆરી-માર્ચ ત્રિમાસિક ગાળામાં વિનિર્માણ ક્ષેત્રના નબળા પ્રદર્શનને કારણે દેશની આર્થિક વૃદ્ધિ ધીમી પડીને 7.4 ટકા થઈ છે. આ સાથે, સમગ્ર નાણાકીય વર્ષ માટે GDP વૃદ્ધિ દર ઘટીને ચાર વર્ષના નીચલા સ્તર 6.5% પર આવી ગયો છે.
કોંગ્રેસ નેતા પ્રિયંકા ગાંધીએ 'X' (અગાઉ ટ્વિટર) પર પોસ્ટ કરીને સરકાર પર આક્ષેપો કર્યા હતા. તેમણે લખ્યું, "દેશની અર્થવ્યવસ્થા ચાર વર્ષના નીચલા સ્તર પર પહોંચી ગઈ છે. સરકારી આંકડા મુજબ, નાણાકીય વર્ષ 2024-25 માં GDP વૃદ્ધિ દર 6.5 ટકા રહ્યો. કોરોના કાળ પછી આ સૌથી સુસ્ત ગતિ છે."
તેમણે વધુમાં દાવો કર્યો કે, "ભાજપ સરકાર આર્થિક મોરચે સતત નિષ્ફળ રહી છે. દેશભરમાં ઉદ્યોગ-ધંધા સંકોચાઈ રહ્યા છે. ઔદ્યોગિક ઉત્પાદન આઠ મહિનાના નીચલા સ્તર પર છે." કોંગ્રેસ મહાસચિવે ભારપૂર્વક જણાવ્યું કે, "સમગ્ર દેશમાં ભયંકર બેરોજગારી છે અને નવી નોકરીઓનું સર્જન થઈ રહ્યું નથી. લોકોની આવક ઘટી રહી છે અને આર્થિક અસમાનતા ઝડપથી વધી રહી છે, તેથી માંગ અને વપરાશ પણ ઘટી રહ્યા છે."
પ્રિયંકા ગાંધીએ આંકડાઓ ટાંકીને સરકારને આડે હાથ લીધી હતી અને સ્પષ્ટ કર્યું હતું કે, વાસ્તવિક આર્થિક પ્રગતિ વિના 'વિકસિત ભારત' જેવા મોટા દાવાઓનો કોઈ અર્થ નથી, તે માત્ર શબ્દોની માયાજાળ છે.