નવી દિલ્હી: સાંજે 8:50 વાગ્યા: જો તમે ફેસબુકનો ઉપયોગ કરો છો, તો તમારા માટે એક અત્યંત ચિંતાજનક સમાચાર છે. વિશ્વભરના લગભગ ૧.૨ અબજ (120 કરોડ) ફેસબુક યુઝર્સનો વ્યક્તિગત ડેટા લીક થયાનો સનસનાટીભર્યો દાવો સામે આવ્યો છે. આ લીક થયેલા ડેટામાં તમારો મોબાઈલ નંબર, નામ, સરનામું, જન્મ તારીખ, શહેર અને દેશ જેવી અત્યંત સંવેદનશીલ માહિતીનો સમાવેશ થાય છે, જે હવે ડાર્ક વેબ પર વેચાઈ રહી છે!
'બાઈટબ્રેકર' નામના હેકરનો દાવો અને 'વેબ સ્ક્રેપિંગ'ની ટેકનિક:
અહેવાલો અનુસાર, આ ભયાવહ ડેટા લીકની પાછળ 'બાઈટબ્રેકર' નામનો એક સાયબર હેકર હોવાનો દાવો કરવામાં આવી રહ્યો છે. આ હેકરે દાવો કર્યો છે કે તેણે ફેસબુકના એક ફીચરમાં રહેલી ખામીનો લાભ ઉઠાવીને આટલી મોટી માત્રામાં માહિતી એકત્રિત કરી છે. જોકે, કેટલાક સાયબર નિષ્ણાતોને શંકા છે કે તેની પાસે ખરેખર તેટલો મોટો ડેટા નહીં હોય જેટલો તે કહી રહ્યો છે.
આ લીકની પ્રક્રિયાને 'વેબ સ્ક્રેપિંગ' કહેવામાં આવે છે. આ એક સ્વચાલિત પદ્ધતિ છે જેમાં બોટ્સનો ઉપયોગ કરીને વેબસાઇટ્સમાંથી માહિતી કાઢવામાં આવે છે. સરળ શબ્દોમાં કહીએ તો, તે મશીનો દ્વારા એક પ્રકારની કોપી-પેસ્ટ છે, જે મોટા પાયે માહિતી ચોરવા માટે ઉપયોગમાં લેવાય છે.
મેટાનું નિવેદન: જૂનો ડેટા કે નવો ખતરો?
ફેસબુકની પેરેન્ટ કંપની મેટા (Meta) આ મુદ્દે પોતાની પ્રતિક્રિયા આપી છે. મેટાનું કહેવું છે કે આ કોઈ નવી ડેટા લીક નથી. તેમના મતે, આ એ જ ડેટા છે જે વર્ષ 2021 માં લીક થયો હતો, જેમાં લગભગ 50 કરોડ ફેસબુક વપરાશકર્તાઓ પ્રભાવિત થયા હતા. જોકે, 'બાઈટબ્રેકર'ના નવા અને મોટા દાવાને ધ્યાનમાં રાખીને, સાયબર નિષ્ણાતો આ સમગ્ર બાબતને ગંભીરતાથી લઈ રહ્યા છે અને તેની વધુ તપાસ કરી રહ્યા છે.
ભારતીય યુઝર્સ પર પણ જોખમ:
હજુ સુધી તે સ્પષ્ટ નથી કે કયા દેશોના વપરાશકર્તાઓ આ લીક થયેલા ડેટા સાથે સંબંધિત છે, પરંતુ ભારત જેવા દેશોમાં જ્યાં ફેસબુકનો કરોડોમાં યુઝર બેઝ છે, ત્યાં ભારતીય યુઝર્સને આ ખતરાથી અસ્પૃશ્ય માની શકાય નહીં. આ ડેટા લીક થવાથી યુઝર્સની ઓળખ, બેંકિંગ વિગતો અને સામાજિક સુરક્ષા સંબંધિત ગંભીર સમસ્યાઓ ઊભી થઈ શકે છે. ફેસબુક યુઝર્સે હવે વધુ સાવચેત રહેવાની અને પોતાની વ્યક્તિગત માહિતીની સુરક્ષા માટે જરૂરી પગલાં લેવાની જરૂર છે.