કાઠમંડુ : નેપાળમાં રાજાશાહીની પુનઃસ્થાપના અને હિંદુ રાષ્ટ્રની સ્થાપનાની માંગ સાથે ચાલી રહેલા પ્રદર્શનનો રવિવારે (આજ રોજ) ચોથો દિવસ હતો, જે દરમિયાન પરિસ્થિતિ વણસી હતી. પોલીસે જણાવ્યું કે, પૂર્વ ગૃહમંત્રી કમલ થાપા અને લગભગ અડધો ડઝન જેટલા અન્ય લોકોને કાઠમંડુમાં રાજાશાહી તરફી વિરોધ પ્રદર્શન દરમિયાન પ્રતિબંધિત વિસ્તારમાં પ્રવેશવાનો પ્રયાસ કરવા બદલ ધરપકડ કરવામાં આવી છે.
રાષ્ટ્રીય પ્રજાતંત્ર પાર્ટી (RPP) અને RPP નેપાળ સહિતના રાજાશાહી સમર્થક જૂથો કાઠમંડુના નારાયણ ચૌર ખાતે વિરોધ પ્રદર્શન કરી રહ્યા હતા. કાઠમંડુ વેલી પોલીસના પ્રવક્તા અપિલ બોહોરાએ જણાવ્યું કે, રાજાશાહીના કટ્ટર સમર્થક અને RPP ના અધ્યક્ષ રાજેન્દ્ર લિંગદેન આ વિરોધ પ્રદર્શનનું નેતૃત્વ કરી રહ્યા હતા. આંદોલનકારીઓએ સુરક્ષા કોર્ડન તોડીને વડાપ્રધાનના સત્તાવાર નિવાસસ્થાન બાલુવાતાર તરફ આગળ વધવાનો પ્રયાસ કર્યો અને પોલીસ સાથે ઘર્ષણમાં ઉતર્યા હતા.
બોહોરાએ વધુમાં જણાવ્યું કે, કમલ થાપા અને અન્ય લોકોને નારાયણહિટી પેલેસ મ્યુઝિયમ વિસ્તારની આસપાસના પ્રતિબંધિત ઝોનનું ઉલ્લંઘન કરવા બદલ ધરપકડ કરવામાં આવી છે. બોહોરાના જણાવ્યા અનુસાર, લગભગ ૧,૨૦૦ રાજાશાહી સમર્થકોએ આ વિરોધ પ્રદર્શનમાં ભાગ લીધો હતો, જેમાં તેઓ ગણરાજ્ય પ્રણાલી વિરુદ્ધ અને રાજાશાહીના સમર્થનમાં સૂત્રોચ્ચાર કરી રહ્યા હતા.
પ્રદર્શનકારીઓ પૂર્વ રાજા જ્ઞાનેન્દ્ર શાહના ફોટોગ્રાફ્સ લઈને આવ્યા હતા અને વડાપ્રધાન કે.પી. ઓલીની આગેવાની હેઠળની સરકાર વિરુદ્ધ સૂત્રોચ્ચાર કરી રહ્યા હતા. પ્રદર્શનકારીઓએ જણાવ્યું હતું કે જ્યાં સુધી રાજાશાહી ફરીથી સ્થાપિત ન થાય ત્યાં સુધી તેઓ પોતાનું આંદોલન ચાલુ રાખશે. આ ઘટના દર્શાવે છે કે નેપાળમાં રાજાશાહીના મુદ્દે રાજકીય અને સામાજિક તણાવ હજુ પણ જીવંત છે.