અમદાવાદ: IPL 2025 નો ઉત્સાહ હવે ચરમસીમા પર છે, ત્યારે ક્વોલિફાયર-૨ માં વરસાદે વિઘ્ન ઊભું કર્યું છે. રવિવારે અમદાવાદના નરેન્દ્ર મોદી સ્ટેડિયમ ખાતે પંજાબ કિંગ્સ (PBKS) અને મુંબઈ ઇન્ડિયન્સ (MI) વચ્ચેની આ હાઈ-વોલ્ટેજ ટક્કર વરસાદના કારણે મોડી શરૂ થઈ હતી, જેનાથી ક્રિકેટ ચાહકોમાં ચિંતા જોવા મળી રહી છે.
મેચ શરૂ થવાની તૈયારીમાં જ હતી કે વરસાદે માહોલ બગાડ્યો. પહેલાં ઝરમર વરસાદ શરૂ થયો, જે થોડીવાર પછી બંધ થતાં પંજાબ કિંગ્સના ખેલાડીઓ મેદાન પર ઉતર્યા, પરંતુ ફરીથી વરસાદનું જોર વધતાં તેમને પાછા ફરવું પડ્યું. આ મેચનો વિજેતા રોયલ ચેલેન્જર્સ બેંગલુરુ (RCB) સામે ફાઇનલમાં ટકરાશે.
રિઝર્વ ડે નથી! શું છે નિયમો?
મેચ શરૂ થવામાં વિલંબ થયો હોવાથી ઓવર્સ ઓછી થવાની શક્યતા છે, અને જો વરસાદ ચાલુ રહેશે તો મેચ રદ થવાની સંભાવના પણ છે. અહીં નોંધવું મહત્વપૂર્ણ છે કે પંજાબ કિંગ્સ અને મુંબઈ ઇન્ડિયન્સ વચ્ચે રમાઈ રહેલી ક્વોલિફાયર-૨ મેચ માટે કોઈ રિઝર્વ ડે રાખવામાં આવ્યો નથી.
નિયમો અનુસાર, જો આ મેચ ૧ જૂનના રોજ રદ કરવામાં આવે છે, તો લીગ તબક્કામાં જે ટીમ પોઈન્ટ ટેબલ પર ઊંચા સ્થાને હતી તે ટીમ ફાઇનલમાં પ્રવેશ કરશે. એટલે કે, જો વરસાદના કારણે મેચ પૂરી ન થઈ શકે, તો પંજાબ કિંગ્સ સીધી ફાઇનલમાં પહોંચી જશે, કારણ કે તેઓ પોઈન્ટ ટેબલમાં મુંબઈ ઇન્ડિયન્સ કરતાં ઉપર હતા.
જો મેચ પૂરી કરવા માટે વરસાદ વિલંબ કરે, તો બંને ઇનિંગ્સમાં ઓછામાં ઓછી પાંચ-પાંચ ઓવર રમવી જરૂરી છે. જો આટલી ઓવર પણ રમી ન શકાય, તો મેચ રદ ગણાશે. ઓછામાં ઓછી ૫ ઓવરની મેચ રમાડવાનો કટ-ઓફ સમય રાત્રે ૧૦:૫૬ PM IST છે.
ઉલ્લેખનીય છે કે, RCB એ પ્રથમ ક્વોલિફાયરમાં પંજાબ કિંગ્સને હરાવીને ફાઇનલમાં પોતાનું સ્થાન સુરક્ષિત કર્યું છે. લીગ તબક્કામાં પંજાબ કિંગ્સ ટોચના સ્થાને રહ્યું હતું, જ્યારે RCB બીજા સ્થાને હતું. બીજી તરફ, મુંબઈ ઇન્ડિયન્સે એલિમિનેટર મેચમાં ગુજરાત ટાઇટન્સને હરાવીને IPL 2025 માં પોતાની આશાઓ જીવંત રાખી હતી. હવે ચાહકો વરસાદ બંધ થાય અને મેચ રમાય તેવી આશા રાખી રહ્યા છે.