અમેરિકા : પેલેસ્ટાઇનને આઝાદ કરો'ના નારા લગાવીને ભીડ પર બોમ્બમારો
અનેક લોકોને ઇજા : યહુદીના કાર્યક્રમ દરમ્યાન હુમલો ! આરોપીની ધરપકડ : તપાસ શરૂ
નવી દિલ્હી, તા.૨: અમેરિકાના કોલોરાડોમાં એક યહૂદી કાર્યક્રમ દરમિયાન એક વ્યક્તિ પર હુમલો કરવામાં આવ્યો. એવું જાણવા મળ્યું છે કે હુમલાખોર આ દરમિયાન ‘ફ્રી પેલેસ્ટાઇન' જેવા નારા લગાવી રહ્યો હતો. હાલમાં, પોલીસે આરોપીને કસ્ટડીમાં લીધો છે. FBI એટલે કે ફેડરલ બ્યુરો ઓફ ઇન્વેસ્ટિગેશનએ તેને આતંકવાદી ઘટના ગણાવી છે. આ હુમલામા અનેક લોકોને ઇજા પહોંચી છે.
મીડિયા રિપોર્ટ્સ અનુસાર, કોલોરાડોના બોલ્ડરમાં એક જૂથ ઇઝરાયલી બંધકોના સ્મરણાર્થે એકત્ર થયું હતું. તે દરમિયાન એક વ્યક્તિએ ભીડ પર મોલોટોવ કોકટેલ ફેંકયા. તેણે ફ્લેમથ્રોવરથી પણ હુમલો કર્યો. હુમલાખોરની ઓળખ મોહમ્મદ સાબરી સુલેમાન તરીકે થઈ છે. એવું જાણવા મળ્યું છે કે હુમલાખોર ભીડ પર હુમલો કરતી વખતે ફ્રી પેલેસ્ટાઇનના નારા લગાવી રહ્યો હતો.
બોલ્ડર પોલીસ વડા સ્ટીફન રેડફર્ને કહ્યું છે કે સ્થાનિક પોલીસ એક વ્યક્તિ હથિયાર સાથે ફરતી અને લોકોને સળગાવતી હોવાની માહિતી મળ્યા બાદ ઘટનાસ્થળે પહોંચી હતી. હુમલામાં ઘાયલ થયેલા તમામ ૬ લોકોની ઉંમર ૬૭ થી ૮૮ વર્ષની વચ્ચે છે. તેમને હોસ્પિટલમાં દાખલ કરવામાં આવ્યા છે. એવું કહેવામાં આવી રહ્યું છે કે એક દર્દીની હાલત ગંભીર છે. આ ઘટનાનો વીડિયો સોશિયલ મીડિયા પર પણ વાયરલ થઈ રહ્યો છે.
હાલમાં પોલીસે હુમલાખોર વિશે વધુ માહિતી આપી નથી. એવું માનવામાં આવે છે કે તેણે એકલા જ આ ઘટનાને અંજામ આપ્યો હતો અને ઘટનાસ્થળે અન્ય કોઈ શંકાસ્પદ વ્યક્તિ જોવા મળી ન હતી. ખાસ વાત એ છે કે તે પોતે આ હુમલામાં ઘાયલ થયો છે અને તેને હોસ્પિટલમાં દાખલ કરવામાં આવ્યો છે. તેને કેટલી ઈજાઓ થઈ છે તે સ્પષ્ટ નથી.
FBI ના ડેપ્યુટી ડિરેક્ટરે લખ્યું, ‘પ્રારંભિક માહિતીના આધારે, આ આતંકવાદી ઘટનાની વિચારધારાથી પ્રેરિત હિંસાની ઘટના તરીકે તપાસ કરવામાં આવી રહી છે. જ્યારે હકીકતો સામે આવશે ત્યારે અમે આ ઘટનાઓ પર સ્પષ્ટ વાત કરીશું.'(૨૩.૫)
(10:23 AM IST)
છેલ્લા 8 દિવસમાં સૌથી લોકપ્રિય 
