હૈદરાબાદ,તા.૦૩: તેલંગાણાના એક IAS અધિકારીએ વિદ્યાર્થીઓ દ્વારા તેમની શાળાઓમાં શૌચાલય સાફ કરવા પર ટિપ્‍પણી કરીને મોટો રાજકીય વિવાદ ઉભો કર્યો છે. વિપક્ષ BRS એ અધિકારીને હટાવવાની માંગ કરી છે, જ્‍યારે રાષ્‍ટ્રીય અનુસૂચિત જાતિ (SC) કમિશને નોટિસ જારી કરીને આ બાબતે વિગતવાર માહિતી માંગી છે.

આયોગે ૩૧ મેના રોજ તેલંગાણાના મુખ્‍ય સચિવ અને પોલીસ મહાનિર્દેશકને નોટિસ જારી કરી હતી અને સંસ્‍થાઓમાં અનુસૂચિત જાતિના વિદ્યાર્થીઓ વિરુદ્ધ IAS અધિકારી દ્વારા કરવામાં આવેલી અપમાનજનક ટિપ્‍પણી અંગે ૧૫ દિવસની અંદર રિપોર્ટ માંગ્‍યો હતો. જોકે, IAS અધિકારી વી.એસ. અલાગુ વારસિનીએ સ્‍પષ્ટતા કરી હતી કે તે જીવન કૌશલ્‍ય વિશે છે, શ્રમ વિશે નહીં.

બીઆરએસે આકરી ટીકા કરી

તાજેતરની સમીક્ષા બેઠકમાં તેલંગાણા સમાજ કલ્‍યાણ નિવાસી શૈક્ષણિક સંસ્‍થાઓ સોસાયટીના સચિવ, આઈએએસ અધિકારી અલાગુ વારસિની, આચાર્યોને વિદ્યાર્થીઓને શૌચાલય, છાત્રાલયના રૂમ સાફ કરવા અને ખોરાક રાંધવામાં સામેલ કરવા સૂચના આપતા હોય તેવી એક ઓડિયો ક્‍લિપ પ્રસારિત થઈ છે, જેની બીઆરએસ દ્વારા આકરી ટીકા કરવામાં આવી છે.

કર્મચારીઓને ૪૦,૦૦૦ રૂપિયા ચૂકવવામાં આવતા હતા

બીઆરએસ એમએલસી કે કવિતાએ કહ્યું છે કે તેમના પક્ષના શાસનકાળ દરમિયાન, દરેક સમાજ કલ્‍યાણ શાળાને સફાઈ કાર્ય માટે ચાર કામચલાઉ કર્મચારીઓને રાખવા બદલ દર મહિને ૪૦,૦૦૦ રૂપિયા મળતા હતા.

તેમણે કહ્યું કે કોંગ્રેસ સરકારે આ વર્ષે મે મહિનાથી આ બંધ કરી દીધું છે.

બીઆરએસ નેતાએ આ પ્રથાને ભેદભાવપૂર્ણ, શોષણકારી ગણાવી અને કહ્યું કે તે બાળ અધિકારો અને ગૌરવના મૂળભૂત સિદ્ધાંતોનું ઉલ્લંઘન કરે છે.