નવી દિલ્હી, [જૂન ૬, ૨૦૨૫]: ભારતીય રિઝર્વ બેંક (RBI) એ આજે અર્થતંત્રને નવી ગતિ આપવા અને દેશના કરોડો સામાન્ય લોકોને મોંઘવારીમાંથી રાહત આપવા માટે એક મોટો નિર્ણય લીધો છે. RBI ગવર્નર સંજય મલ્હોત્રાએ આજે રેપો રેટમાં 50 બેસિસ પોઈન્ટ્સ એટલે કે 0.50 ટકાના જમ્બો ઘટાડાની જાહેરાત કરી છે. આ તાજા ઘટાડા બાદ હવે રેપો રેટ 6.00 ટકાથી ઘટીને 5.50 ટકા થઈ ગયો છે. RBIના આ નિર્ણયથી બેંકો દ્વારા આપવામાં આવતી લોનની વ્યાજ દરો ઘટશે, જેના પરિણામે સામાન્ય લોકોને સસ્તા દરે હોમ લોન, કાર લોન અને અન્ય લોન મળી શકશે. લોન સસ્તી થવાથી માસિક હપ્તા (EMI)માં પણ ઘટાડો થશે, જે ગ્રાહકોને મોટી રાહત આપશે અને બચત વધારવામાં મદદ કરશે.
EMI પર શું અસર પડશે?
રેપો રેટના ઘટાડાની સીધી અસર તમારી માસિક EMI પર પડશે. ભારતીય સ્ટેટ બેંક (SBI) ના ઉદાહરણ દ્વારા સમજીએ તો, SBI હાલમાં 8.00 ટકાના પ્રારંભિક વ્યાજ દર પર હોમ લોન આપી રહી છે. RBIના આજના નિર્ણય બાદ SBIના હોમ લોનના પ્રારંભિક દરો 8.00 ટકાથી ઘટીને 7.50 ટકા થઈ જશે, જેના કારણે તમારી માસિક EMI માં પણ ઘટાડો થશે.
એક વર્ષમાં કેટલી થશે બચત?
ધારો કે તમે SBI પાસેથી 8.00 ટકાના વ્યાજ દરે 30 વર્ષ માટે 50 લાખ રૂપિયાની હોમ લોન લીધી હતી. આ માટે તમારે દર મહિને લગભગ 36,688 રૂપિયાની EMI ચૂકવવી પડતી હતી. રેપો રેટ ઘટ્યા બાદ લોન સસ્તી થશે અને તમને 7.50 ટકાના હિસાબે લોન ચૂકવવી પડશે. 7.50 ટકાના હિસાબે 30 વર્ષ માટે 50 લાખ રૂપિયાની હોમ લોન માટે તમારે દર મહિને લગભગ 34,961 રૂપિયાની EMI ચૂકવવી પડશે. આ રીતે, તમને દર મહિને લગભગ 1727 રૂપિયાની બચત થશે. આ હિસાબે, દર વર્ષે તમારા લગભગ 20,724 રૂપિયા બચશે.
ફ્લોટિંગ રેટ પર મળે છે હોમ લોન
જોકે, અહીં એ પણ ધ્યાન રાખવું પડશે કે મોટાભાગની બેંકો ફ્લોટિંગ રેટ પર હોમ લોન આપે છે. ફ્લોટિંગ રેટનો અર્થ એ છે કે જેમ જેમ RBI રેપો રેટ ઘટાડશે, તેમ તેમ તમારા લોનની વ્યાજ દરો અને EMI પણ ઘટશે. તેવી જ રીતે, જ્યારે RBI રેપો રેટ વધારશે, ત્યારે તમારા લોનની વ્યાજ દરો અને EMI પણ વધશે. આ નિર્ણયથી અર્થતંત્રમાં રોકડ પ્રવાહ વધશે અને ઉપભોક્તા ખર્ચને પ્રોત્સાહન મળશે તેવી અપેક્ષા છે.