મુંબઈ, તા.૬: ભારતીય રિઝર્વ બેંકે ફરી એકવાર રેપો રેટમાં ઘટાડો કર્યો છે. RBI ગવર્નર સંજય મલ્‍હોત્રાએ રેપો રેટમાં ૫૦ બેસિસ પોઈન્‍ટનો ઘટાડો કરવાની જાહેરાત કરી છે, જેના પછી રેપો રેટ ૬ ટકાથી ઘટીને ૫.૫ ટકા થઈ ગયો છે. ચાલો તમને જણાવીએ કે શું તેનાથી FD પરની કમાણી પર અસર થશે કે નહીં?

RBI એ દેશની અર્થવ્‍યવસ્‍થાને મજબૂત કરવા, લોકોને વધુ ખર્ચ કરવા માટે પ્રેરિત કરવા માટે આ વર્ષે ત્રીજી વખત રેપો રેટમાં ઘટાડો કર્યો છે. આ સાથે, RBI એ CRR માં પણ ૧ ટકાનો ઘટાડો કર્યો છે. ફેબ્રુઆરી ૨૦૨૫ થી, જ્‍યારે રેપો રેટમાં ઘટાડો કરવામાં આવ્‍યો છે, ત્‍યારથી દેશની મોટી જાહેર અને ખાનગી બેંકોએ FD પર વ્‍યાજ દરમાં ઘટાડો કર્યો છે. આવી સ્‍થિતિમાં, નિષ્‍ણાતોના મતે, રેપોમાં ૦.૫ ટકાના ઘટાડા પછી પણ, બેંકો FD પર વ્‍યાજ ઘટાડી શકે છે.

SBI સંશોધન અહેવાલ મુજબ, ફેબ્રુઆરી ૨૦૨૫ થી અત્‍યાર સુધી, FD માં ૩૦ થી ૭૦ બેસિસ પોઇન્‍ટનો ઘટાડો જોવા મળ્‍યો છે. ફિક્‍સ ડિપોઝિટ દરમાં ઘટાડાની સાથે, બેંકો બચત ખાતા પરના વ્‍યાજ દરમાં પણ ઘટાડો કરી રહી છે. અહેવાલમાં કહેવામાં આવ્‍યું છે કે બેંકોએ બચત ખાતા પરના વ્‍યાજ દર પહેલાથી જ ૨.૭૦% ના લઘુત્તમ દર સુધી ઘટાડી દીધા છે. નિષ્‍ણાતો માને છે કે આગામી દિવસોમાં, FD પરના વ્‍યાજ દરમાં ઘટાડો થઈ શકે છે.