સહારનપુર : ઉત્તર પ્રદેશના સહારનપુરમાં શુક્રવારની સવારે એક મોટી ઘટના ટળી હતી, જ્યારે ભારતીય સેનાના અત્યાધુનિક અપાચે હેલિકોપ્ટર (AH-64E) નું કટોકટી ઉતરાણ (ઇમરજન્સી લેન્ડિંગ) કરાવવું પડ્યું હતું. સદનસીબે, આ ઘટનામાં બંને પાયલટ સંપૂર્ણપણે સુરક્ષિત છે અને હેલિકોપ્ટરને પણ કોઈ મોટું નુકસાન થયું નથી.
પ્રાથમિક માહિતી મુજબ, ટેકનિકલ ખામીના કારણે આ અપાચે હેલિકોપ્ટરનું ઈમરજન્સી લેન્ડિંગ કરાવવામાં આવ્યું હતું. ચિલકાના પોલીસ સ્ટેશન વિસ્તારના જોધેબાંસ ગામ પાસે યમુના નદીના કિનારે એક ખેતરમાં આ લડાકુ હેલિકોપ્ટર ઉતારવામાં આવ્યું હતું, જેના કારણે આસપાસના વિસ્તારમાં હડકંપ મચી ગયો હતો.
કેવી રીતે થયું ઈમરજન્સી લેન્ડિંગ?
મળતી વિગતો અનુસાર, આ હેલિકોપ્ટર સરસાવા એરફોર્સ બેઝ પરથી નિયમિત અભ્યાસ માટે ઉડાન ભર્યું હતું. જોકે, ઉડાન દરમિયાન હેલિકોપ્ટરના કંટ્રોલ પેનલમાં અચાનક ચેતવણી સંકેત દેખાયો. પાયલટોએ સમયસૂચકતા વાપરીને તત્કાળ નિર્ણય લીધો અને જોધેબાંસ ગામના એક ખેતરમાં અત્યંત સાવચેતીપૂર્વક હેલિકોપ્ટરનું લેન્ડિંગ કરાવ્યું. આ ઘટનાની જાણ થતાં જ આસપાસના ગ્રામજનો મોટી સંખ્યામાં એકઠા થઈ ગયા હતા.
તપાસના આદેશ:
ઘટનાની જાણ થતાં જ ચિલકાના પોલીસ સ્ટેશનની પોલીસ અને સેનાના અધિકારીઓ તાત્કાલિક ઘટનાસ્થળે પહોંચી ગયા હતા અને વિસ્તારને સુરક્ષિત કરી લીધો હતો. ભારતીય વાયુસેનાની એક ટેકનિકલ ટીમ પણ તાબડતોબ ઘટનાસ્થળે પહોંચી હતી, જેણે હેલિકોપ્ટરમાં સર્જાયેલી ખામીની તપાસ શરૂ કરી દીધી છે. વાયુસેનાએ આ સમગ્ર ઘટનાની ઊંડાણપૂર્વક તપાસ શરૂ કરી દીધી છે, જેથી ખામી પાછળનું ચોક્કસ કારણ જાણી શકાય.
અપાચે AH-64E હેલિકોપ્ટર વિશે:
અપાચે AH-64E ને વિશ્વનું સૌથી અદ્યતન લડાકુ હેલિકોપ્ટર માનવામાં આવે છે, જે હવાઈ અને જમીન પરના હુમલા માટેની મિસાઈલોથી સજ્જ છે. ભારતે ૨૦૧૫ માં અમેરિકી કંપની બોઇંગ સાથે ૨૨ અપાચે હેલિકોપ્ટર માટે રૂ. ૧૩,૯૫૧.૫૭ કરોડનો સોદો કર્યો હતો. આ હેલિકોપ્ટર મુખ્યત્વે પઠાણકોટ અને જોરહાટ એરબેઝ પર તૈનાત છે અને તેમણે જૂના રશિયન Mi-35 હેલિકોપ્ટરોનું સ્થાન લીધું છે. આ ઘટના બાદ આ અતિ મહત્વના હેલિકોપ્ટરની જાળવણી અને ટેકનિકલ પાસાઓ પર વધુ ધ્યાન અપાશે તેવી શક્યતા છે.