રુદ્રપ્રયાગ: ઉત્તરાખંડના રુદ્રપ્રયાગ જિલ્લામાં એક મોટી હેલિકોપ્ટર દુર્ઘટના ટળતા સૌએ રાહતનો શ્વાસ લીધો છે. શુક્રવારે ક્રિસ્ટલ એવિએશન કંપનીના એક હેલિકોપ્ટરમાં ટેકનિકલ ખામી સર્જાતા પાયલોટે તાત્કાલિક નિર્ણય લઈને સેરસી બડાસુ પાસેના હાઇવે પર ઇમરજન્સી લેન્ડિંગ કરાવ્યું હતું. આ ઘટના સમયે હેલિકોપ્ટરમાં પાંચ યાત્રીઓ સવાર હતા, જે તમામ સંપૂર્ણપણે સુરક્ષિત છે. જોકે, આ ઘટનામાં પાયલોટને સામાન્ય ઈજાઓ પહોંચી હોવાના અહેવાલ છે.
પ્રાપ્ત માહિતી અનુસાર, હેલિકોપ્ટરે ગુપ્તકાશીથી ટેકઓફ કર્યા બાદ તરત જ તેમાં ટેકનિકલ ખામી જણાઈ હતી. પાયલોટે પરિસ્થિતિની ગંભીરતા પારખીને કોઈપણ જોખમ ન લેતા, હાઇવે પર જ ઇમરજન્સી લેન્ડિંગ કરવાનો સાહસિક નિર્ણય લીધો. એડીજી લો એન્ડ ઓર્ડર ડૉ. વી. મુરુગેશનએ આ ઘટનાની પુષ્ટિ કરતા જણાવ્યું કે ગુપ્તકાશી નજીક ટેકનિકલ સમસ્યાને કારણે આ ઇમરજન્સી લેન્ડિંગ કરવામાં આવ્યું હતું.
લેન્ડિંગ પ્રક્રિયા દરમિયાન, નિયંત્રણ જાળવવા છતાં હેલિકોપ્ટર રસ્તાની બાજુમાં પાર્ક કરેલી એક કાર સાથે અથડાયું હતું. સદનસીબે, આ કારમાં કોઈ વ્યક્તિ સવાર નહોતી, જેના કારણે કોઈ જાનહાનિ થઈ નથી. જોકે, કારને થોડું નુકસાન પહોંચ્યું હોવાનું જાણવા મળ્યું છે.
આ ઘટનામાં પાયલોટની સમયસૂચકતા અને સાહસિકતાને કારણે એક મોટી દુર્ઘટના ટળી છે, જેમાં પાંચ યાત્રીઓના જીવ બચ્યા છે. સ્થાનિક પ્રશાસન અને પોલીસ ઘટનાસ્થળે પહોંચી ગયા હતા અને જરૂરી કાર્યવાહી હાથ ધરી હતી. હેલિકોપ્ટરમાં સર્જાયેલી ટેકનિકલ ખામીના ચોક્કસ કારણો જાણવા માટે વધુ તપાસ શરૂ કરવામાં આવી છે.