મુંબઈ, 7 જૂન, 2025: રિલાયન્સ ઇન્ડસ્ટ્રીઝના ચેરમેન અને મેનેજિંગ ડિરેક્ટર મુકેશ અંબાણીએ મુંબઈના ઇન્સ્ટિટ્યુટ ઑફ કેમિકલ ટેકનોલોજી (ICT) ને 151 કરોડ રૂપિયાની શરત વિનાની ગ્રાન્ટ આપવાની જાહેરાત કરી છે. આ તે જ કૉલેજ છે જ્યાંથી તેમણે 1970ના દાયકામાં પોતાનો અભ્યાસ કર્યો હતો. આ અનુદાનને મુકેશ અંબાણીની તેમના ગુરુ અને સંસ્થા પ્રત્યેની 'ગુરુ દક્ષિણા' તરીકે જોવામાં આવી રહ્યું છે.
મુકેશ અંબાણીએ ICT પરિસરમાં, જેને અગાઉ યુનિવર્સિટી ડિપાર્ટમેન્ટ ઑફ કેમિકલ ટેકનોલોજી (યુડીસીટી) તરીકે ઓળખવામાં આવતું હતું, ત્યાં લગભગ 3 કલાક જેટલો સમય વિતાવ્યો હતો. તેઓ એક કાર્યક્રમમાં ભાગ લેવા માટે ઇન્સ્ટિટ્યુટ આવ્યા હતા, જ્યાં પ્રોફેસર એમ. એમ. શર્માની જીવનચરિત્ર 'ડિવાઈન સાયન્ટિસ્ટ'નું વિમોચન કરવામાં આવ્યું હતું.
આ પ્રસંગે મુકેશ અંબાણીએ ભાવુક થઈને યાદ કર્યું કે કેવી રીતે યુડીસીટીમાં પ્રોફેસર શર્માના પ્રથમ ક્લાસે તેમને પ્રેરિત કર્યા હતા. તેમણે ઉમેર્યું કે, આગામી સમયમાં પ્રોફેસર શર્માએ ભારતના આર્થિક સુધારાઓની રૂપરેખા તૈયાર કરવામાં પણ મહત્વપૂર્ણ ભૂમિકા ભજવી હતી. અંબાણીએ જણાવ્યું કે, પ્રોફેસર શર્માએ નીતિ-નિર્માતાઓને સમજાવ્યું કે ભારતની પ્રગતિ માટે ભારતીય ઉદ્યોગોને 'લાઈસન્સ અને પરમિટ રાજ'ના બંધનમાંથી મુક્ત કરવા જરૂરી છે, જેથી ભારતીય ઉદ્યોગ વિસ્તરણ કરી શકે, આયાત પર નિર્ભરતા ઘટાડી શકે અને વિશ્વભરમાં સ્પર્ધામાં ઊભા રહી શકે.
મુકેશ અંબાણીએ વધુમાં કહ્યું કે, "મારા પિતા ધીરુભાઈ અંબાણીની જેમ જ તેમની (પ્રોફેસર શર્માની) પણ તીવ્ર ઈચ્છા હતી કે ભારતની ઇન્ડસ્ટ્રી અભાવમાંથી બહાર નીકળીને વિશ્વમાં અગ્રણી બને." તેમણે ભારપૂર્વક જણાવ્યું કે, ભવિષ્યની વિચારસરણી ધરાવતા આ બંને મહાનુભાવોનું માનવું હતું કે ખાનગી સાહસ સાથે વિજ્ઞાન અને ટેકનોલોજી મળીને ભારતમાં સમૃદ્ધિ લાવી શકે છે.
મુકેશ અંબાણીએ પ્રોફેસર શર્માને 'રાષ્ટ્ર ગુરુ- ભારતનો ગુરુ' ગણાવ્યા અને કહ્યું કે ભારતીય કેમિકલ ઇન્ડસ્ટ્રીના વિકાસનો શ્રેય તેમને જ જાય છે.
ગુરુ દક્ષિણાની વાત કરતા મુકેશ અંબાણીએ પ્રોફેસર શર્માના નિર્દેશ અનુસાર ICT ને શરત વિના 151 કરોડ રૂપિયા આપવાની જાહેરાત કરી. તેમણે જણાવ્યું કે, પ્રોફેસર શર્માએ તેમને ICT માટે "કંઈક મોટું કરવું" કહ્યું હતું. આ દાનનો ઉલ્લેખ કરતા મુકેશ અંબાણીએ કહ્યું, "જ્યારે તેઓ કંઈ કહે છે, ત્યારે અમે ફક્ત સાંભળીએ છીએ, વિચારતા નથી." તેમણે પ્રોફેસર શર્મા માટે આ જાહેરાત કરતા તેમને ખૂબ આનંદ થયો હોવાનું પણ જણાવ્યું હતું.