નવી દિલ્હી :મોહમ્મદ યુનુસના નેતૃત્વમાં બાંગ્લાદેશ સરકારની રચના થયા પછી નવી દિલ્હી અને ઢાકા વચ્ચેના સંબંધોમાં ખટાશ આવી છે, પરંતુ બકરી ઇદ (ઈદ-ઉલ-અઝહા) ના અવસર પર, વડા પ્રધાન નરેન્દ્રભાઈ  મોદીએ યુનુસને પત્ર લખીને લોકો અને સરકારને અભિનંદન આપ્યા છે. આ પત્ર 4 જૂનનો છે, જેમાં પીએમ મોદીએ લખ્યું છે કે, "ભારતના લોકો અને સરકાર વતી, હું તમને અને બાંગ્લાદેશના લોકોને ઈદ-ઉલ-અઝહાના શુભ અવસર પર મારી હાર્દિક શુભેચ્છાઓ પાઠવું છું." તેમણે તહેવારના સાંસ્કૃતિક મહત્વ પર ભાર મૂક્યો અને બલિદાન, કરુણા અને ભાઈચારાના શાશ્વત મૂલ્યોના તેના પ્રતિબિંબ પર પ્રકાશ પાડ્યો.  

    યુનુસને લખેલા પત્રમાં પીએમ મોદીએ લખ્યું કે, "આ પવિત્ર તહેવાર ભારતના સમૃદ્ધ અને વૈવિધ્યસભર સાંસ્કૃતિક વારસાનો અભિન્ન ભાગ છે અને દેશભરમાં લાખો ઇસ્લામિક લોકો દ્વારા ખૂબ જ આનંદ અને ઉત્સાહ સાથે ઉજવવામાં આવે છે. તે આપણને બલિદાન, કરુણા અને ભાઈચારાના શાશ્વત મૂલ્યોની યાદ અપાવે છે, જે શાંતિપૂર્ણ અને સમાવિષ્ટ વિશ્વના નિર્માણ માટે જરૂરી છે." મોહમ્મદ યુનુસે પણ પીએમ મોદીના આ પત્રનો જવાબ આપ્યો છે. ૬ જૂનના રોજ જવાબ આપતા, યુનુસે પીએમ મોદીનો તેમના સંદેશ બદલ આભાર માન્યો અને ઈદ દ્વારા ઉજવાતા સહિયારા મૂલ્યો અને પરંપરાઓની પ્રશંસા કરી.

      પીએમ મોદીના પત્રનો જવાબ આપતા, યુનુસે કહ્યું, "ઈદ-ઉલ-અઝહા એ ચિંતનનો સમય છે, જે સમુદાયોને એકસાથે લાવે છે અને વિશ્વભરના લોકોના વધુ લાભ માટે સાથે મળીને કામ કરવા માટે આપણા બધાને પ્રેરણા આપે છે. ભારત અને બાંગ્લાદેશ વચ્ચે પરસ્પર આદર અને સહયોગ ચાલુ રહેવામાં વિશ્વાસ વ્યક્ત કરતા, તેમણે કહ્યું, "મને વિશ્વાસ છે કે પરસ્પર આદર અને સમજણની ભાવના આપણા દેશોને આપણા લોકોના ભલા માટે સાથે મળીને કામ કરવા માટે માર્ગદર્શન આપતી રહેશે." તેમણે કહ્યું, "આ શુભ પ્રસંગે, હું તમને સારા સ્વાસ્થ્ય અને ખુશીની શુભેચ્છા પાઠવું છું અને ભારતના લોકો માટે શાંતિ, પ્રગતિ અને સમૃદ્ધિની ઇચ્છા રાખું છું."