તાલાલા કેસર કેરીની એક્સપોર્ટમાં થયો તોતિંગ ઘટાડો
કમોસમી વરસાદે બગાડી તાલાલા કેસરની મીઠાશઃ ૫૦૦ ટન એક્સપોર્ટના બદલે માત્ર ૧૦૦ ટન જ એક્સપોર્ટ થઈ : કેસર કેરીની નિકાસની સીઝન સામાન્ય રીતે ૬૦-૬૫ દિવસ ચાલે છે. પરંતુ આ વર્ષે માત્ર ૨૦-૨૫ દિવસ જ ચાલી છે
નવી દિલ્હી તા.૧૦: ગીર-સોમનાથ જિલ્લાના તાલાલા ગીર વિસ્તારની કેસર કેરી સમગ્ર વિશ્વમાં તેની મીઠાશના કારણે જાણીતી છે. આ વર્ષે કમોસમી વરસાદના કારણે તેની મીઠાશ પર અસર થઈ છે. તાલાલાની કેસર કેરી વિદેશમાં મોટા પાયે એક્સપોર્ટ થાય છે.
એક્સપોર્ટ થનારી કેસર કેરીનું ગ્રેડિંગ કરવામાં આવે છે અને સાથે સાથે આંતરરાષ્ટ્રીય ધારાધોરણનું પાલન પણ કરવામાં આવે છે. પરંતુ આ વર્ષે કમોસમી વરસાદની અસરથી આ વર્ષે કેસર કેરીના એક્સપોર્ટમાં નોંધપાત્ર ઘટાડો થયો છે. વર્ષ ૨૦૧૫-૧૬થી ૨૦૨૦ સુધી દર વર્ષે ૪૫૦થી ૫૦૦ ટન કેસર કેરીની નિકાસ થતી હતી. જે આ વર્ષે ઘટીને માત્ર ૧૦૦ ટન જેટલી જ રહેવાનો અંદાજ છે. કમોસમી વરસાદની અસર કેસર કેરીની ક્વોલિટી બગડી છે.
એક્સપોર્ટરના જણાવ્યા મુજબ, આ વર્ષે કાર્ગોનું ભાડું ઘટયું છે. યુકેમાં ગત વર્ષે પ્રતિ કિલોનો ફ્લાઇટ રેટ ૨૯૦ રૂપિયાથી ઘટીને ૨૦૭ રૂપિયા થયો છે. પરંતુ કેરીની ગુણવત્તા જળવાઈ નથી. તેમણે વધુમાં જણાવ્યું કે, ઓસ્ટ્રેલિયામાં દર વર્ષે ૪૦-૪૫ ટનની માગ હોવા છતાં, મુંબઈના રેડિયેશન પ્લાન્ટ બંધ હોવાથી નિકાસ અટકી ગઈ છે.
આ વર્ષે કેરીની નિકાસની સીઝન માત્ર ૨૦-૨૫ દિવસ જ ચાલી હતી. તાલાલા ગીરની કેસર કેરીની નિકાસની સીઝન સામાન્ય રીતે ૬૦-૬૫ દિવસ ચાલે છે. પરંતુ આ વર્ષે માત્ર ૨૦-૨૫ દિવસ જ ચાલી છે. હવે ૧ જૂનથી ૧૫ જૂન સુધી કચ્છની કેસર કેરીનું એક્સર્પોટિંગ ચાલુ છે. રશિયા-યુક્રેન યુદ્ધની અસર અને ચીનમાં પણ નિકાસ પ્રભાવિત થઈ છે. સાથે સાથે તાલાલા માર્કેટિંગ યાર્ડમાં કેસર કેરીનો વેપાર ઘટયો છે.
ઉલ્લેખનીય છે કે, તાલાલા ગીરની જમીન અને આબોહવા કેસર કેરીના ઉત્પાદન માટે ખૂબ અનુકૂળ છે, જેના કારણે અહીંની કેરીનો સ્વાદ અને સુગંધ અન્ય વિસ્તારની કેરીઓ કરતાં અલગ પડે છે. મુખ્યત્વે જૂનાગઢ જિલ્લામાં આ કેરીનું વાવેતર થાય છે.(૩૮.૫)
(9:50 AM IST)
છેલ્લા 8 દિવસમાં સૌથી લોકપ્રિય 
