ટોંક (રાજસ્થાન), મંગળવાર, ૧૦ જૂન ૨૦૨૫: રાજસ્થાનના ટોંક જિલ્લામાં બનાસ નદી આજે ૧૧ યુવકો માટે કાળ બનીને આવી. જયપુરથી પિકનિક મનાવવા આવેલા ૧૧ યુવકો બનાસ નદીના ઊંડા પાણીમાં નહાવા પડ્યા બાદ દુર્ઘટનાનો ભોગ બન્યા હતા. અત્યાર સુધીમાં ૮ યુવકોના મૃતદેહ મળી આવ્યા છે, જ્યારે અન્ય ૩ યુવકોની શોધખોળ યુદ્ધના ધોરણે ચાલી રહી છે. આ ઘટનાથી સમગ્ર વિસ્તારમાં શોકનો માહોલ છવાઈ ગયો છે.
મળતી માહિતી મુજબ, આ કરૂણ ઘટના મંગળવારે બપોરે લગભગ ૧૨ વાગ્યે બનાસ નદી પરના જૂના પુલ પાસે બની હતી. જયપુરથી આવેલા ૧૧ મિત્રોનો સમૂહ પિકનિક મનાવવા બનાસ નદી પહોંચ્યો હતો. તમામ યુવકો નદીમાં નહાવા માટે ઉતર્યા હતા. જોકે, થોડા સમય બાદ અચાનક પાણીનો જોરદાર પ્રવાહ આવતા એક પછી એક યુવકો પાણીમાં તણાવા લાગ્યા. આ દ્રશ્ય જોઈને સ્થાનિક લોકોએ તાત્કાલિક પોલીસને જાણ કરી.
બચાવ કામગીરી અને સુરક્ષા વ્યવસ્થા પર સવાલો
ઘટનાની જાણ થતા જ પોલીસ અને તંત્રની ટીમ તાત્કાલિક ઘટનાસ્થળે દોડી આવી હતી. એસપી વિકાસ સાંગવાને જણાવ્યું કે, અત્યાર સુધીમાં ૮ યુવકોના મૃતદેહ મળી આવ્યા છે, જ્યારે બાકીના ૩ યુવકોની શોધખોળ હજુ ચાલુ છે. નેશનલ ડિઝાસ્ટર રિસ્પોન્સ ફોર્સ (NDRF) ની ટીમ પણ બચાવ કામગીરીમાં જોડાઈ છે. તમામ મળી આવેલા મૃતદેહોને એમ્બ્યુલન્સ દ્વારા હોસ્પિટલ પહોંચાડવામાં આવ્યા છે.
મૃતકોની ઓળખ કરવાની કાર્યવાહી ચાલી રહી છે, અને પ્રાથમિક માહિતી અનુસાર તમામ યુવકો જયપુરના રહેવાસી છે. સ્થાનિકોનું કહેવું છે કે જ્યાં આ દુર્ઘટના બની તે નદીનો જૂનો પુલ છે અને ત્યાં પાણીની ઊંડાઈ ઘણી વધારે છે. સૌથી ચિંતાજનક બાબત એ છે કે, આ સ્થળ પર કોઈ ચેતવણી બોર્ડ કે સુરક્ષા વ્યવસ્થા ગોઠવવામાં આવી ન હતી. આ બેદરકારી પર સ્થાનિકો દ્વારા સવાલો ઉઠાવવામાં આવી રહ્યા છે, અને ભવિષ્યમાં આવી દુર્ઘટનાઓ ટાળવા માટે તાત્કાલિક પગલાં લેવાની માંગ કરવામાં આવી રહી છે.