ગુજરાત પેટાચૂંટણીનો રાજકીય જંગઃ વિસાવદરમાં ભાજપ ૧૮ વર્ષનો દુષ્કાળ ખતમ કરવા આતુર - કડીમાં ગઢ જાળવી રાખવાનો પડકારઃ ૨૩ જૂને થશે ‘‘દૂધનું દૂધ અને પાણીનું પાણી!''
વિસાવદર - ભાજપના કિરીટ પટેલ, ‘‘આપ'' ના ગોપાલ ઈટાલિયા અને કોંગ્રેસના નિતિન રણપરિયા વચ્ચે ત્રિપાંખિયો જંગઃ કડી - ભાજપના રાજેન્દ્ર ચાવડા, કોંગ્રેસના રમેશ ચાવડા અને ‘‘આપ'' ના જગદીશ ચાવડા મેદાનમાં
રાજકોટઃ ગુજરાતમાં આગામી ૧૯ જૂને યોજાનારી બે વિધાનસભા બેઠકો - જૂનાગઢ જિલ્લાની વિસાવદર અને મહેસાણા જિલ્લાની કડી - પરની પેટાચૂંટણીએ રાજકીય ગરમાવો વધારી દીધો છે. આ બંને બેઠકો માત્ર સંખ્યા નહીં, પણ પક્ષોની પ્રતિષ્ઠાનો સવાલ બની ગઈ છે. ખાસ કરીને વિસાવદર બેઠક પર ભાજપ માટે ૧૮ વર્ષના કમળ ન ખીલવાનો દુષ્કાળ ખતમ કરવાનો પડકાર છે, જ્યારે કડી બેઠક પર ભાજપ પોતાનો ગઢ જાળવી રાખવા સંઘર્ષ કરી રહ્યું છે.
વિસાવદર - ભાજપ માટે શાખનો સવાલ, ત્રિપાંખિયો જંગ
૨૦૨૨ની વિધાનસભા ચૂંટણીમાં ભાજપે રાજ્યની ૧૮૨ માંથી ૧૫૬ બેઠકો જીતીને ઐતિહાસિક પ્રદર્શન કર્યું હતું. પ્રદેશ અધ્યક્ષ સી.આર. પાટીલના નેતળત્વમાં આ ભવ્ય સિદ્ધિ હાંસલ કરવા છતાં, જૂનાગઢની વિસાવદર બેઠક પર ભાજપને સફળતા મળી નહોતી. આ બેઠક આમ આદમી પાર્ટી (AAP) ના ભૂપેશ ભાયાણીએ જીતી હતી, પરંતુ બાદમાં તેમણે ધારાસભ્ય પદ પરથી રાજીનામું આપીને ભાજપનો હાથ પકડતા આ બેઠક પર પેટાચૂંટણી યોજાઈ રહી છે.
ભાજપ છેલ્લા ૧૮ વર્ષથી આ બેઠક જીતી શકયું નથી, આથી આ વખતે પાર્ટીએ આ બેઠકને પ્રતિષ્ઠાની લડાઈમાં પરિવર્તિત કરી છે અને સી.આર. પાટીલને ચૂંટણી પ્રચારની સંપૂર્ણ જવાબદારી સોંપી છે. ભાજપે આ બેઠક પરથી કિરીટ પટેલને ઉમેદવાર બનાવ્યા છે, જ્યારે કોંગ્રેસમાંથી નિતિન રણપરિયા મેદાનમાં છે. AAP એ પોતાના પૂર્વ પ્રદેશ અધ્યક્ષ ગોપાલ ઈટાલિયાને આ બેઠક પરથી મેદાનમાં ઉતાર્યા છે. અરવિંદ કેજરીવાલ ખુદ દિલ્હીથી તેમનું ઉમેદવારી પત્ર ભરવા આવ્યા હતા, જે દર્શાવે છે કે AAP પણ આ બેઠકને કેટલી ગંભીરતાથી લઈ રહી છે. એક સમયે આ બેઠક ભાજપના દિગ્ગજ નેતા અને પૂર્વ મુખ્યમંત્રી કેશુભાઈ પટેલનો ચૂંટણી ક્ષેત્ર રહી ચૂકી છે. છેલ્લી ચૂંટણીમાં ભાજપ આ બેઠક ૭ હજાર મતોથી હાર્યું હતું.
કડી બેઠક - ભાજપના દિગ્ગજ નેતાનો ગઢ, વારસો જાળવવાનો પ્રયાસઃ
મહેસાણા જિલ્લાની કડી બેઠક ૨૦૦૯ માં અનામત કેટેગરીમાં સામેલ થઈ હતી. તે પહેલાં ભાજપના દિગ્ગજ નેતા અને પૂર્વ નાયબ મુખ્યમંત્રી નિતિન પટેલ અહીંથી ચાર વખત ચૂંટણી જીત્યા હતા. કડી બેઠક પર પેટાચૂંટણી એટલા માટે યોજાઈ રહી છે કારણ કે અહીંથી ભાજપના ધારાસભ્ય કરસનભાઈ સોલંકીનું નિધન થયું છે, જેના કારણે આ બેઠક ખાલી પડી હતી.
ભાજપે અહીંથી રાજેન્દ્ર ચાવડાને ઉમેદવાર બનાવ્યા છે. કોંગ્રેસે કડીથી રમેશ ચાવડાને ટિકિટ આપી છે, જેઓ ૨૦૧૨ માં કડીથી ચૂંટણી જીત્યા હતા. ૨૦૧૭ માં કરસનભાઈ સોલંકીએ આ બેઠક જીતી લીધી હતી. ખ્ખ્ભ્ એ અહીંથી જગદીશ ચાવડાને મેદાનમાં ઉતાર્યા છે.
(10:04 AM IST)
છેલ્લા 8 દિવસમાં સૌથી લોકપ્રિય 
