પેશાવર, તા.૧૨: પાકિસ્‍તાનના પેશાવરમાં આજે સવારે ૪.૭ની તીવ્રતાનો ભૂકંપનો આંચકો અનુભવાયો હતો, જેના કારણે ખૈબર પખ્‍તુનખ્‍વા પ્રાંત સહિત આસપાસના વિસ્‍તારોમાં પણ ધરતી ધ્રુજી ઉઠી હતી. સિસ્‍મોલોજીકલ સેન્‍ટરના હવાલાથી જિયો ન્‍યૂઝે અહેવાલ આપ્‍યો છે કે, આ ભૂકંપથી કોઈ જાનહાનિ કે મોટા પાયે નુકસાન થયું નથી.

જિયો ન્‍યૂઝના અહેવાલ મુજબ, આ ભૂકંપનું કેન્‍દ્ર અફઘાનિસ્‍તાનની હિન્‍દુ કુશ પર્વતમાળામાં ૨૧૧ કિલોમીટરની ઊંડાઈએ આવેલું હતું. ભૂકંપના આંચકા બાદ કોઈ તાત્‍કાલિક નુકસાન કે જાનહાનિના સમાચાર પ્રાપ્ત થયા નથી.

ઉલ્લેખનીય છે કે, આ ભૂકંપ લગભગ એક મહિના અગાઉ આવેલા ૫.૩ની તીવ્રતાના ભૂકંપ બાદ આવ્‍યો છે, જેણે ઇસ્‍લામાબાદ અને ખૈબર પખ્‍તુનખ્‍વાના મર્દાન, સ્‍વોટ, નૌશેરા, સ્‍વાબી અને ઉત્તર વઝીરિસ્‍તાન સહિતના વિસ્‍તારોને ધ્રુજાવી દીધા હતા. તે ભૂકંપનું કેન્‍દ્ર પણ હિન્‍દુ કુશ ક્ષેત્રમાં ૨૩૦ કિલોમીટરની ઊંડાઈએ હતું, જેના કોઓર્ડિનેટ્‍સ 36.63 N અક્ષાંશ અને 71.13 E રેખાંશ પર નોંધાયા હતા. આ ઉપરાંત, એપ્રિલ મહિનામાં પણ પાકિસ્‍તાનના વિવિધ વિસ્‍તારોમાં વધુ બે ભૂકંપના આંચકા અનુભવાયા હતા.

ભૂસ્‍તરશાષાીઓના મતે, પાકિસ્‍તાન સિસ્‍મિક ગતિવિધિ માટે સંવેદનશીલ વિસ્‍તાર છે, કારણ કે તે ભારતીય અને યુરેશિયન ટેકટોનિક પ્‍લેટોની સીમા પર આવેલું છે. ભારતીય પ્‍લેટનું ઉત્તર દિશામાં યુરેશિયન પ્‍લેટ તરફનું દબાણ આ પ્રદેશમાં વારંવાર ભૂકંપના આંચકાનું કારણ બને છે.

દરમિયાન, જિયો ન્‍યૂઝે એ પણ પ્રકાશિત કર્યું છે કે, તાજેતરના દિવસોમાં કરાચી શહેરમાં લગભગ ૩૦ હળવા ભૂકંપના આંચકા અનુભવાયા છે. ચીફ મેટિરોલોજિસ્‍ટ આમિર હૈદરે સમજાવ્‍યું કે લંધિ ફોલ્‍ટ લાઇન દાયકાઓ પછી સક્રિય બની છે અને હાલમાં તે સામાન્‍યકરણ તબક્કામાંથી પસાર થઈ રહી છે