અમદાવાદ: અમદાવાદમાં થયેલી ભયાનક પ્લેન દુર્ઘટના બાદ રાહત અને બચાવ કામગીરી પૂરજોશમાં ચાલી રહી છે, ત્યારે રાજ્યના આરોગ્ય તંત્ર દ્વારા પણ યુદ્ધના ધોરણે પગલાં લેવામાં આવી રહ્યા છે. આરોગ્ય અગ્ર સચિવ શ્રી ધનંજય દ્વિવેદીએ માહિતી આપતાં જણાવ્યું હતું કે, આ દુર્ઘટનામાં મૃત્યુ પામેલા લોકોની ઓળખ સુનિશ્ચિત કરવા માટે અમદાવાદ સિવિલ હોસ્પિટલ દ્વારા તેમના સગાઓના DNA સેમ્પલ લેવાની વ્યવસ્થા ગોઠવવામાં આવી છે. આ પગલું મૃતદેહોની ઓળખ પ્રક્રિયાને ઝડપી અને સચોટ બનાવવામાં મદદ કરશે.
શ્રી દ્વિવેદીએ વધુમાં જણાવ્યું કે, દુર્ઘટનામાં ૫૦ જેટલા ઇજાગ્રસ્તોને અમદાવાદ સિવિલ હોસ્પિટલ ખાતે દાખલ કરવામાં આવ્યા છે અને તેમની સારવાર ચાલી રહી છે. સંતોષની વાત એ છે કે, તમામ દાખલ દર્દીઓની સ્થિતિ હાલ સ્થિર (સ્ટેબલ) છે, અને તબીબોની ટીમ તેમની સઘન દેખરેખ રાખી રહી છે.
DNA સેમ્પલ ક્યાં અને કોણ આપી શકશે?
મૃતકોના સ્વજનો માટે DNA સેમ્પલ આપવાની ખાસ વ્યવસ્થા અમદાવાદ સિવિલ હોસ્પિટલના કસોટી ભવન ખાતે કરવામાં આવી છે. આ કસોટી ભવન બી.જે. મેડિકલ કોલેજના ગ્રાઉન્ડ ફ્લોર પર આવેલું છે. હોસ્પિટલ તંત્ર દ્વારા સ્પષ્ટતા કરવામાં આવી છે કે, મૃતકના નજીકના સગાં – જેવા કે માતા-પિતા અથવા બાળકો જ DNA સેમ્પલ આપી શકશે. સિવિલ હોસ્પિટલ તંત્રે તમામ સગા-સ્નેહીજનોને આ કસોટી ભવન ખાતે આવીને DNA સેમ્પલ આપવા માટે અનુરોધ કર્યો છે, જેથી ઓળખ પ્રક્રિયા ઝડપથી પૂર્ણ થઈ શકે.
ઇમરજન્સી માહિતી માટે હેલ્પલાઇન નંબર જાહેર
અમદાવાદ પ્લેન દુર્ઘટનાને પગલે, અમદાવાદ સિવિલ હોસ્પિટલના ટ્રોમા (ઇમરજન્સી) સેન્ટરમાં દર્દીલક્ષી સારવાર સંબંધિત માહિતી મેળવવા માટે હોસ્પિટલ તંત્ર દ્વારા બે ખાસ ફોન નંબર પણ જાહેર કરવામાં આવ્યા છે. દુર્ઘટનાનો ભોગ બનેલા લોકોના પરિવારજનો અને સ્નેહીજનો નીચેના નંબર પર સંપર્ક કરીને માહિતી મેળવી શકે છે:
 * 6357373831
 * 6357373841
આ હેલ્પલાઇન નંબર ચોવીસ કલાક કાર્યરત રહેશે, જેથી જરૂરિયાતમંદોને તાત્કાલિક માહિતી મળી શકે. આ દુર્ઘટનામાં અસરગ્રસ્ત થયેલા લોકોના પરિવારજનોને શક્ય તમામ મદદ પૂરી પાડવા માટે વહીવટીતંત્ર કટિબદ્ધ છે.