સંયુક્ત રાષ્ટ્ર પરમાણુ નિરીક્ષક સંસ્થા IAEA ના રિપોર્ટમાં ખુલાસો થયો છે કે ઈરાન વિશ્વને છેતરપિંડી કરી રહ્યું છે અને વિનાશની યોજના બનાવી રહ્યું છે. IAEA એ  શોધી કાઢ્યું કે ઈરાન 20 વર્ષમાં પહેલી વાર તેની પરમાણુ જવાબદારીઓનું પાલન કરી રહ્યું નથી. આ પગલાથી તણાવ વધી શકે છે અને આ વર્ષના અંતમાં ઈરાન પર યુએન પ્રતિબંધો ફરીથી લાદવાની પ્રક્રિયા શરૂ થઈ શકે છે. ઈરાને તરત જ પ્રતિક્રિયા આપતા કહ્યું કે તે "સુરક્ષિત જગ્યાએ" એક નવી સંવર્ધન સુવિધા સ્થાપિત કરશે અને "અન્ય પગલાં પણ લેવાનું આયોજન કરવામાં આવી રહ્યું છે." ઈરાનના વિદેશ મંત્રાલય અને પરમાણુ ઉર્જા સંગઠને એક સંયુક્ત નિવેદનમાં જણાવ્યું હતું કે, "ઈસ્લામિક રિપબ્લિક ઓફ ઈરાન પાસે આ રાજકીય પ્રસ્તાવનો જવાબ આપવા સિવાય કોઈ વિકલ્પ નથી." ઈરાન અંગેના ઠરાવ પર IAEA ના ગવર્નિંગ બોડીના સભ્ય દેશો દ્વારા મતદાન કરવામાં આવ્યું હતું.

રાજદ્વારીઓએ નામ ન આપવાની શરતે જણાવ્યું હતું કે વિયેનામાં યોજાયેલી બેઠકમાં આંતરરાષ્ટ્રીય પરમાણુ ઉર્જા એજન્સી (IAEA) ના ગવર્નિંગ બોડીના ઓગણીસ સભ્ય દેશોએ ઠરાવની તરફેણમાં મતદાન કર્યું હતું. રશિયા, ચીન અને બુર્કિના ફાસોએ તેનો વિરોધ કર્યો હતો જ્યારે ૧૧ સભ્યોએ મતદાન કર્યું ન હતું. એસોસિએટેડ પ્રેસ દ્વારા જોવામાં આવેલા ડ્રાફ્ટ ઠરાવમાં, ગવર્નિંગ બોડીએ ઈરાનને "વિલંબ કર્યા વિના" અનેક સ્થળોએ મળી આવેલા યુરેનિયમના નિશાનની લાંબા સમયથી ચાલી રહેલી તપાસમાં જોડાવા હાકલ કરી હતી. પશ્ચિમી અધિકારીઓને શંકા છે કે આ નિશાન પુરાવા આપી શકે છે કે ઈરાન ગુપ્ત રીતે 2003 માં પરમાણુ શસ્ત્રોના કાર્યક્રમ પર કામ કરી રહ્યું હતું. આ ઠરાવ ફ્રાન્સ, બ્રિટન, જર્મની અને યુનાઇટેડ સ્ટેટ્સ દ્વારા રજૂ કરવામાં આવ્યો હતો.

મતદાન પછી ઈરાની રાજ્ય ટેલિવિઝન સાથે વાત કરતા, ઈરાનના પરમાણુ ઊર્જા સંગઠનના પ્રવક્તાએ જણાવ્યું હતું કે તેમની એજન્સીએ તાત્કાલિક IAEA ને તેહરાન કયા "ચોક્કસ અને અસરકારક" પગલાં લેશે તેની જાણ કરી હતી. પ્રવક્તા બેહરોઝ કમાલવંદીએ જણાવ્યું હતું કે, "એક કાર્યવાહી એ છે કે સંવર્ધન માટે ત્રીજું સલામત સ્થળ બનાવવું." તેમણે સ્થાન વિશે વધુ માહિતી આપી ન હતી. ઈરાન પાસે ફોર્ડો અને નાતાન્ઝ ખાતે બે ભૂગર્ભ સ્થળો છે અને શંકાસ્પદ ઇઝરાયેલી હુમલાઓએ તે સુવિધાને લક્ષ્ય બનાવ્યું ત્યારથી તે નાતાન્ઝ નજીકના પર્વતોમાં ટનલ બનાવી રહ્યું છે. "પરમાણુ અપ્રસાર સંધિ (NPT) હેઠળ નિર્ધારિત કહેવાતા 'સુરક્ષા જવાબદારીઓ' અનુસાર, ઈરાન કાયદેસર રીતે તેની બધી પરમાણુ સામગ્રી અને પ્રવૃત્તિઓની જાણ કરવા માટે બંધાયેલો છે અને આંતરરાષ્ટ્રીય પરમાણુ ઊર્જા એજન્સીના નિરીક્ષકોને ખાતરી કરવાની મંજૂરી આપે છે કે તેનો ઉપયોગ ફક્ત શાંતિપૂર્ણ હેતુઓ માટે થઈ રહ્યો છે અને અન્ય કોઈ હેતુ માટે નથી."

આ મતદાન એવા સંવેદનશીલ સમયે થયું છે જ્યારે પ્રદેશમાં તણાવ સતત વધી રહ્યો છે. દરમિયાન, યુએસ સ્ટેટ ડિપાર્ટમેન્ટે બુધવારે જાહેરાત કરી હતી કે તે મધ્ય પૂર્વમાં કામગીરી માટે બિન-આવશ્યક ગણાતા કર્મચારીઓની હાજરી ઘટાડી રહ્યું છે. યુએસ પ્રમુખ ડોનાલ્ડ ટ્રમ્પે અગાઉ કહ્યું હતું કે જો વાટાઘાટો નિષ્ફળ જાય, તો યુએસ અથવા ઇઝરાયલ ઈરાનના પરમાણુ કેન્દ્રોને નિશાન બનાવી શકે છે. તેહરાનના ઝડપથી આગળ વધી રહેલા પરમાણુ કાર્યક્રમ અંગે અમેરિકા અને ઈરાન વચ્ચે વાટાઘાટો ચાલી રહી છે. દરમિયાન, ઓમાનના વિદેશ મંત્રીએ ગુરુવારે કહ્યું હતું કે આ વાટાઘાટોનો છઠ્ઠો રાઉન્ડ રવિવારે ઓમાનમાં યોજાશે. ડ્રાફ્ટ ઠરાવ સીધો યુએસ-ઈરાન વાટાઘાટોનો ઉલ્લેખ કરે છે, જેમાં 'ઈરાની પરમાણુ કાર્યક્રમથી ઉદ્ભવતી સમસ્યાઓના રાજદ્વારી ઉકેલો માટે સમર્થન' પર ભાર મૂકવામાં આવ્યો છે.