ઈરાન અને ઈઝરાયલ વચ્ચે તણાવ ફરી એકવાર ચરમસીમાએ છે. બંને દેશો એકબીજા સામે લશ્કરી કાર્યવાહી અને હવાઈ હુમલા કરી રહ્યા છે, જેના કારણે સમગ્ર ક્ષેત્રમાં અનિશ્ચિતતાનું વાતાવરણ છે. ચાલો સમજીએ કે આ યુદ્ધના મૂળ ક્યાં છે અને 'પરમાણુ કરાર' તેમાં શું ભૂમિકા ભજવી રહ્યો છે

   ઈઝરાયલે ઈરાનની રાજધાની તેહરાન, તેના પરમાણુ મથકો અને લશ્કરી મથકોને નિશાન બનાવીને હવાઈ હુમલા કર્યા છે. આ હુમલાઓમાં ઘણા પરમાણુ વૈજ્ઞાનિકો અને ઈરાનના ટોચના સૈન્ય કમાન્ડરો માર્યા ગયા હોવાના અહેવાલ છે. ઈરાને ઈઝરાયલની રાજધાની તેલ અવીવ તેમજ જેરુસલેમ અને ગોલાન હાઇટ્સ પર બેલિસ્ટિક મિસાઈલ છોડીને પણ બદલો લીધો છે. આ ઈરાની હુમલાઓથી ઈઝરાયલમાં જાનમાલનું નુકસાન થયું છે. આ સીધી લશ્કરી કાર્યવાહી દર્શાવે છે કે બંને દેશો વચ્ચેની દુશ્મનાવટ હવે ખુલ્લા યુદ્ધમાં ફેરવાઈ ગઈ છે.

   આ સંઘર્ષનું મુખ્ય કારણ ઈરાનનો પરમાણુ કાર્યક્રમ છે. ઈઝરાયલ બિલકુલ ઇચ્છતું નથી કે ઈરાન પરમાણુ શસ્ત્રો બનાવે. ઇઝરાયલને ડર છે કે જો ઇરાન પરમાણુ શક્તિ બનશે, તો તે તેનો દુરુપયોગ કરી શકે છે અને સમગ્ર વિશ્વ માટે ખતરો ઉભો કરી શકે છે. આ જ કારણ છે કે ઇઝરાયલે ઇરાનના પરમાણુ સ્થળોને સીધા નિશાન બનાવ્યા છે. 

ઇરાન દાવો કરે છે કે તેનો પરમાણુ કાર્યક્રમ ફક્ત શાંતિપૂર્ણ હેતુઓ માટે છે, જેમ કે વીજળી ઉત્પાદન અને તબીબી વિજ્ઞાનમાં પરમાણુ ટેકનોલોજીનો ઉપયોગ. પરંતુ ઇઝરાયલ માને છે કે આ દાવાની આડમાં, ઇરાન શાંતિથી પરમાણુ શસ્ત્રો બનાવી અને સંગ્રહ કરી રહ્યું છે.