લખનઉના એરપોર્ટ પર 250 હજ યાત્રીઓને લઈને જઈ રહેલા સાઉદી એરલાઇન્સના વિમાનમાં લેન્ડિંગ વખતે ટેકનિકલ ખામી સર્જાઈ હતી. વિમાનના પૈડામાંથી તણખા અને ધુમાડો નીકળતાં અફરાતફરી સર્જાઈ હતી. સદનસીબે બધા મુસાફરોને સમયસર સુરક્ષિત રીતે બહાર કાઢવામાં આવ્યા હતા અને ફાયર બ્રિગેડની ટીમે આગ પર કાબુ મેળવ્યો હતો.

મળતી માહિતી મુજબ રવિવારે સવારે લખનૌના ચૌધરી ચરણ સિંહ એરપોર્ટ પર 250 હજ યાત્રીઓને લઈને જઈ રહેલા સાઉદી એરલાઇન્સના વિમાનમાં લેન્ડિંગ ગિયરમાં ટેકનિકલ ખામી સર્જાઈ હતી. પૈડામાંથી તણખા અને ધુમાડો નીકળતો જોઈને પાયલોટે વિમાન અટકાવ્યું અને એર ટ્રાફિક કંટ્રોલને જાણ કરી. આ ઘટનાથી મુસાફરોમાં ગભરાટનો માહોલ જોવા મળ્યો.

સાઉદી એરલાઇન્સની ફ્લાઇટ SV-3112 શનિવારે રાત્રે 10:45 વાગ્યે જેદ્દાહ એરપોર્ટથી ઉડાન ભરી હતી અને રવિવારે સવારે 6:30 વાગ્યે લખનઉ એરપોર્ટ પહોંચી હતી. એરપોર્ટ સૂત્રોના જણાવ્યા અનુસાર લેન્ડિંગ પછી ડાબા પૈડામાંથી ધુમાડો અને તણખા નીકળતા જોવા મળ્યા હતા. ત્યારબાદ વિમાનને પાછળ ધકેલીને ટેક્સીવે પર લઈ જવામાં આવ્યું, જ્યાં બધા મુસાફરોને સુરક્ષિત રીતે બહાર કાઢવામાં આવ્યા.

હાઇડ્રોલિક સિસ્ટમમાં અચાનક લીકેજ થવાના કારણે થયેલી સમસ્યા છતાં પાઇલટે વિમાનને સુરક્ષિત રીતે લેન્ડ કરવામાં સફળતા મેળવી. સૂત્રોએ સંકેત આપ્યો હતો કે જો તે ટેકઓફ દરમિયાન બન્યું હોત તો તે મોટી દુર્ઘટનાનું કારણ બની શક્યું હોત. જો કે પાઈલોટની ત્વરિત સુઝબુઝથી મોટી દુર્ઘટના ટળી ગઈ. ફ્લાઇટમાં કોઈ અકસ્માત થયો ન હતો.