અમદાવાદમાં 12 જૂનના રોજ થયેલા ભયાનક એર ઈન્ડિયા વિમાન દુર્ઘટનાની તપાસમાં એક મોટી સફળતા મળી છે. તપાસકર્તાઓએ કોકપીટ વોઈસ રેકોર્ડર (CVR) શોધી કાઢ્યું છે. અગાઉ, ફ્લાઇટ ડેટા રેકોર્ડર (FDR) પણ મળી આવ્યું હતું.

આ અકસ્માતમાં 270 લોકોએ જીવ ગુમાવ્યા છે. અકસ્માતની તપાસ કરી રહેલા એરક્રાફ્ટ એક્સિડેન્ટ ઇન્વેસ્ટિગેશન બ્યુરો (AAIB) એ અગાઉ ફક્ત ફ્લાઇટ ડેટા રેકોર્ડર મળવાની પુષ્ટિ કરી હતી. પરંતુ હવે કોકપીટ વોઇસ રેકોર્ડર પણ મળી આવ્યું છે.

પ્રધાનમંત્રીના મુખ્ય સચિવ પીકે મિશ્રાએ રવિવારે ઘટના સ્થળની મુલાકાત લીધી હતી અને ઘાયલોને મળ્યા હતા. તેમણે તપાસ અને રાહત કાર્યનો અહેવાલ લીધો હતો અને અસરગ્રસ્ત પરિવારોને શક્ય તમામ મદદની ખાતરી આપી હતી.

અધિકારીઓએ પીકે મિશ્રાને જણાવ્યું હતું કે બંને બ્લેક બોક્સ સુરક્ષિત છે. તેમને શોધવાથી અકસ્માતનું કારણ શોધવાનું સરળ બનશે. AAIB એ તપાસ શરૂ કરી છે, જ્યારે યુએસ નેશનલ ટ્રાન્સપોર્ટેશન સેફ્ટી બોર્ડ પણ અલગથી તપાસ કરી રહ્યું છે, કારણ કે વિમાન અમેરિકામાં બનાવવામાં આવ્યું હતું.

પીકે મિશ્રાએ સર્કિટ હાઉસ ખાતે એક ઉચ્ચ સ્તરીય બેઠક પણ યોજી છે. આ બેઠકમાં કેન્દ્ર અને રાજ્ય સરકારો, AAIB અને એરપોર્ટ ઓથોરિટી ઓફ ઈન્ડિયાના ઉચ્ચ અધિકારીઓ હાજર રહ્યા હતા. બેઠકમાં રાહત, બચાવ અને તપાસ કાર્યની વિગતવાર ચર્ચા કરવામાં આવી હતી.

પી કે મિશ્રાએ પત્રકારોને જણાવ્યું હતું કે, "આ અકસ્માતની ભયાનકતાથી હું ખૂબ જ દુઃખી છું. દરેક વ્યક્તિ દુઃખી છે. પીડિતો પ્રત્યે સંવેદના વ્યક્ત કરવી અને તેમના દુઃખમાં ભાગીદાર બનવું એ આપણી ફરજ છે."