નવી દિલ્હી : પહલગામ આતંકવાદી હુમલા પછી, વિશ્વભરમાં પાકિસ્તાનનો આતંકવાદી ચહેરો ખુલ્લો પડી ગયો છે. ફરી એકવાર પાકિસ્તાનને ગ્રે લિસ્ટમાં મૂકવાની માંગ થઈ રહી છે. દરમિયાન, વૈશ્વિક આતંકવાદી ભંડોળ પર નજર રાખતી સંસ્થા FATF (ફાઇનાન્સિયલ એક્શન ટાસ્ક ફોર્સ) એ 22 એપ્રિલના રોજ જમ્મુ અને કાશ્મીરના પહેલગામમાં થયેલા ભયાનક આતંકવાદી હુમલાની સખત નિંદા કરી છે. આ હુમલામાં પાકિસ્તાન સમર્થિત આતંકવાદીઓએ 26 નિર્દોષ લોકોની હત્યા કરી હતી. સોમવારે જારી કરાયેલા એક નિવેદનમાં FATFએ કહ્યું, "પૈસા અને નેટવર્ક વિના આવા હુમલા શક્ય નથી." FATFનું આ નિવેદન સીધું પાકિસ્તાન પર નિશાન સાધે છે.

FATF એ એ પણ સ્પષ્ટ કર્યું કે હવે તે આતંકવાદના ભંડોળને રોકવા માટે સભ્ય દેશો દ્વારા લેવામાં આવેલા નક્કર અને અસરકારક પગલાં પર વધુ ધ્યાન આપી રહ્યું છે. આ નિવેદન એવા સમયે આવ્યું છે જ્યારે ભારતે પાકિસ્તાન દ્વારા આતંકવાદને સતત સમર્થન અને ભંડોળ પૂરું પાડવાના પુરાવા ખુલ્લા પાડ્યા છે.

પાકિસ્તાનને ગ્રે લિસ્ટમાં મૂકવાની તૈયારી!

સૂત્રોના જણાવ્યા અનુસાર, ભારત હવે પાકિસ્તાનને ફરીથી FATF ની 'ગ્રે લિસ્ટ'માં મૂકવાની પ્રક્રિયા શરૂ કરવા જઈ રહ્યું છે. ભારત 25 ઓગસ્ટે યોજાનારી એશિયા પેસિફિક ગ્રુપની બેઠક અને 20 ઓક્ટોબરે યોજાનારી FATF ની પૂર્ણ બેઠક પહેલા પાકિસ્તાન વિરુદ્ધ એક વિગતવાર ડોઝિયર તૈયાર કરી રહ્યું છે.

પાકિસ્તાનનો 'ગ્રે લિસ્ટ' સાથે જૂનો સંબંધ છે

પાકિસ્તાનને સૌપ્રથમ 2008 માં FATF ગ્રે લિસ્ટમાં મૂકવામાં આવ્યું હતું. તેને 2010 માં દૂર કરવામાં આવ્યું હતું, પરંતુ 2012 માં ફરીથી સામેલ કરવામાં આવ્યું હતું. તેને 2015 માં બાકાત રાખવામાં આવ્યું હતું, પછી 2018 માં ફરીથી 'ગ્રે લિસ્ટ'માં મૂકવામાં આવ્યું હતું. FATF એ ઓક્ટોબર 2022 માં તેને બાકાત રાખ્યું હતું, પરંતુ સુધારણા ચાલુ રાખવા માટે સૂચનાઓ આપી હતી.

FATF મુજબ, વિશ્વના 200 થી વધુ દેશો અને પ્રદેશો તેના નેટવર્ક સાથે જોડાયેલા છે અને આતંકવાદી ભંડોળ રોકવા માટે સાથે મળીને કામ કરી રહ્યા છે. FATF એ તાજેતરમાં જ કહ્યું હતું કે તે સોશિયલ મીડિયા, ક્રાઉડ ફંડિંગ અને વર્ચ્યુઅલ એસેટ્સ જેવા નવા ખતરાઓ વિશે ચેતવણી જારી કરશે અને ટૂંક સમયમાં વિગતવાર વિશ્લેષણ પ્રકાશિત કરશે.

FATFના વડા એલિસા ડી એન્ડા માદ્રાઝોએ જર્મનીના મ્યુનિકમાં 'નો મની ફોર ટેરર' કોન્ફરન્સમાં કહ્યું, "આતંકવાદીઓને ફક્ત એક જ વાર સફળ થવું પડે છે, પરંતુ આપણે તેમને દરેક વખતે રોકવા પડશે. આ લડાઈ કોઈ એક દેશ, સંસ્થા કે કંપનીની નથી - તે સમગ્ર વિશ્વની સહિયારી જવાબદારી છે."