મુંબઈ, જૂન 17, 2025: હવાઈ મુસાફરીનો રોમાંચ હવે ભયમાં પલટાઈ રહ્યો છે! ખાસ કરીને રાષ્ટ્રીય વાહક એર ઇન્ડિયાની ફ્લાઈટ્સમાં વારંવાર સર્જાતી ટેકનિકલ ખામીઓએ મુસાફરોની સુરક્ષા પર ગંભીર સવાલો ઉભા કર્યા છે. અમદાવાદ દુર્ઘટનાના ઘા હજુ તાજા છે ત્યાં છેલ્લા 24 કલાકમાં વધુ બે આંતરરાષ્ટ્રીય ફ્લાઈટ્સમાં ખામી સર્જાતા મુસાફરોની યાત્રા અટકી પડી છે. શું એર ઇન્ડિયાની જાળવણી વ્યવસ્થામાં ક્યાંક ગાબડું છે?
કોલકાતામાં અટકી સાન ફ્રાન્સિસ્કો-મુંબઈની ઉડાન:
આજે વહેલી સવારે એક મોટી ઘટના સામે આવી છે. સાન ફ્રાન્સિસ્કોથી મુંબઈ જતી એર ઇન્ડિયાની ફ્લાઇટ AI180, જે બોઇંગ 777-200LR પ્રકારનું વિમાન હતું, તે નિર્ધારિત સમય મુજબ મંગળવારે 00:45 વાગ્યે કોલકાતા એરપોર્ટ પર પહોંચી. મુંબઈ માટે આગળ વધવાને બદલે, વિમાનના ડાબા એન્જિનમાં ટેકનિકલ ખામી સર્જાઈ. પીટીઆઈ સમાચાર એજન્સીના અહેવાલ મુજબ, આ ખામી એટલી ગંભીર હતી કે ફ્લાઇટને આગળ વધારવાનું જોખમી બન્યું. આખરે, સવારે લગભગ 05:20 વાગ્યે, થાકેલા અને મૂંઝાયેલા મુસાફરોને વિમાનમાંથી ઉતરી જવાની જાહેરાત કરવામાં આવી. મુંબઈ પહોંચવાની આશા રાખતા સેંકડો મુસાફરો કોલકાતામાં અટવાઈ ગયા, તેમના પ્રવાસની અનિશ્ચિતતાએ તેમની ચિંતા વધારી દીધી છે.
હોંગકોંગથી દિલ્હીની ફ્લાઇટ અધવચ્ચેથી પરત ફરી:
માત્ર એક દિવસ પહેલા, સોમવારે, આવી જ એક અન્ય ઘટના બની હતી. હોંગકોંગથી દિલ્હી જતી એર ઇન્ડિયાની બોઇંગ 787-8 ડ્રીમલાઈનર ફ્લાઇટ AI 315 ના પાઇલટને ટેક-ઓફના થોડા જ સમયમાં તકનીકી સમસ્યાની શંકા ગઈ. મુસાફરોની સલામતીને પ્રાધાન્ય આપતા, પાઇલટે ફ્લાઇટને તાત્કાલિક હોંગકોંગ પરત ફેરવી. એરલાઇન દ્વારા નિવેદન જારી કરીને જણાવાયું કે ફ્લાઇટ સુરક્ષિત રીતે ઉતરી ગઈ હતી અને તમામ મુસાફરોને ઉતારી દેવામાં આવ્યા હતા. વિમાનનું સંપૂર્ણ નિરીક્ષણ કરવામાં આવી રહ્યું છે. રસપ્રદ વાત એ છે કે, flightradar24.com અનુસાર, AI315 તેના નિર્ધારિત સમય કરતાં લગભગ 3.5 કલાકના વિલંબ પછી જ હોંગકોંગથી ઉપડી હતી. આટલા લાંબા વિલંબ પછી પણ ટેકનિકલ ખામી સર્જાતા એર ઇન્ડિયાની જાળવણી પ્રક્રિયા પર સવાલો ઉભા થાય છે.
અમદાવાદ દુર્ઘટનાના પડઘા:
આ ટેકનિકલ ખામીના બનાવો એવા સમયે સામે આવ્યા છે જ્યારે 12 જૂનના રોજ અમદાવાદમાં બનેલી ભયાનક દુર્ઘટનાના ઘા હજુ તાજા છે. તે દિવસે લંડન જતી એર ઇન્ડિયાની બોઇંગ 787-8 ડ્રીમલાઈનર ફ્લાઇટ, જેમાં 242 મુસાફરો અને ક્રૂ સભ્યો હતા, તે ટેક-ઓફના એક મિનિટ કરતા પણ ઓછા સમયમાં મેડિકલ કોલેજ સંકુલમાં ક્રેશ થઈ હતી. આ દુર્ઘટનામાં 270 થી વધુ લોકોના કરૂણ મોત થયા હતા.
એક જ અઠવાડિયામાં આ ત્રીજી ફ્લાઇટમાં ટેકનિકલ ખામી સર્જાતા એર ઇન્ડિયાની વિશ્વસનીયતા દાવ પર લાગી છે. મુસાફરોમાં ભયનો માહોલ છે અને તેઓ એર ઇન્ડિયાની ઉડાન ભરતા પહેલા બે વાર વિચારવા મજબૂર બન્યા છે. નાગરિક ઉડ્ડયન મંત્રાલયે આ ગંભીર મુદ્દાને તાત્કાલિક ધ્યાનમાં લેવો જોઈએ અને એર ઇન્ડિયાના વિમાનોની જાળવણી અને સલામતી ધોરણોની સઘન તપાસ કરવી જોઈએ. શું ભારતના આકાશમાં ઉડાન ભરવી સલામત છે? આ પ્રશ્નનો જવાબ એર ઇન્ડિયાએ ઝડપથી આપવો પડશે.